Naduh ba la wan ka niam khristan ka iktiar u Longkñi Khasi ka la hiar ha ka imlang ka sahlang u khun Khasi. Bun ki kam ba dei leh u longkñi mynta la shimti da u kpa ki khun ka ïing. U longkñi mynshuwa u peit ïa ki khun, ki pyrsa bad ïa ka ïing ka sem. U don ka jing-kit khlieh shisha ïa ka ïing ka sem. Katba mynta u longkñi um don bor shuh ban peit ïa ki khun ki pyrsa namar kim da ñiew burom kum ha ki por ba mynshuwa, namar ka jinghikai ka niam, khristan ka la tyllep ïa ka dustur ka riti u Khasi. Ka ong kumne, to burom ïa ka kmie bad ïa u kpa ym ïa u kñi. Te mynta ha kiba bun ki kam ki jam la shimti da u kpa ka ïing. Kum ka nuksa na ka kam ïateh ktien ban pynshong-kurim ïa ki khun la shimti da u kpa bad ki rangbah balang. Ym shuh da u kñi kaba dei ka rukom leh ha ngi ki khasi. Kumta ka bor u longkñi ka la hiar shisha ha ka dustur ka riti u Khasi. Katba na ka liang ki rangbah Khasi te ym da tip shai la ka la hiar kum ka iktiar u longkñi ne ka dang ïeng rasong kum uta u khadar bor ba la ioh ia ka nam bad ka burom ha ki por ba mynshuwa. Te lada ka la hiar ruh, to ngin ïeng tylli kawei ban pyni ha ka pyrthei ba u rangbah Khasi u don shisha ka bor bad ka iktiar kaba khlaiñ bha ha ka imlang ka sahlang u khun Khasi khara. U rangbah Khasi um dei ban ai lad ïa ka jinglong rangbah ba kan hiar arsut sha ka kyrdan kaba sha trai ha ka imlang ka sahlang u khun Khasi. C. B. Iawphniaw
