Shillong, Nailur 12
U Myntri Rangbah ka Jylla u Conrad Sangma u la pynthikna ba ka Sorkar kam don kano-kano ka jingthmu ban pynduh ïa ki skul Deficit ne ban knieh noh ïa ki skul hynrei ka jingthmu ka Sorkar ka long ban ïakren ban sngap ïa ka jingpynsngew jong ki skul.
Ka jingjubab u Myntri Rangbah ka Jylla ka dei ïa ka jingkylli ba la kylli da u Bah Ardent Basaïawmoit u MLA ka Nongkrem Constituency.
U la ïathuh ba ki jaid skul bapher-bapher ki wan ban kyrpad ha la ki jong ki jong ki jingkyrpad jong ki na ka Sorkar, kumta u la ong ba kane ka pynshem jingeh ïa ka Sorkar ba kan ïoh ïa ka rai ka ban pynïa ryngkatlang ïa baroh ki skul.
U la ïathuh ba ki don ki skul kiba wan kyrpad ïa ka Sorkar ba kan shimti noh ïa kita ki skul, bad ki don pat ki skul kiba kyrpad ïa ka Sorkar ban pynneh beit kum ka skul Deficit ïa ki.
Kumta u la ong ba ban pynbeit ïa kane, ka Sorkar ka la khot ban ïakren ïaphylliew jingmut bad ki nongïalam skul bad ha kane ka jingïakren la wanrah ïa ka Meghalaya Education Grant ban ïakren hynrei u la ong ba lada ki skul kim mon ïa kane ka jingthmu ka Sorkar kan ym leh jubor.
U la bynrap ba ka MEG kam dei kaba la dep pyntreikam hynrei ka dei tang ban wanrah ban ïakren bad ka shong ha ka jingïakren la ki pdiang ne kim pdiang.
Ha kawei pat ka jingkylli, u Myntri ba dei khmih ïa ka tnad Commerce and Industries u Bah Sniawbhalang Dhar uba dei ruh u Symbud Myntri Rangbah ka Jylla u la ïathuh ba kam shym don kano-kano ka jingtyrwa ban aiti ha ki ‘riew shimet ïa ka Mawmluh Cherra Cements Limited.
Ïa kane u la jubab halor ka jingkylli ba la wanrah da u MLA ka Nongkrem Constituency u Bah Ardent Miller Basaïawmoit.
U Bah Sniawbhalang u la ong ba ka jingtyrwa mynshwa na ka bynta ban don ki ban ïatreilang ne ban khot da ka ‘Joint Venture Partner’ ban ïatreilang bad ka MCCL kam shym la urlong namar ym shym don kiba ïahap ne ibit ban ïatreilang.
U la pynshai ba ki don 3 tylli ki company kiba la tyrwa hynrei kawei na kine la shah kyntait noh, kawei pat kam kwah ban ïatreilang bad kawei pat kaba la jied ban ïatreilang hynrei hadien katto-katne por ki la ïathuh ba kim kwah shuh ban ïatreilang.
Kumta hadien kane u Myntri Rangbah ka Jylla u la khot ïa ka jingïalang bad u MLA ka Sohra, u MDC, u Syiem bad kiwei pat ki nongïalam ba hakhmat ka thaiñ Sohra bad ki la rai ba ka kham bha ban khang noh ïa kane ka karkhana.
Haba jubab ïa ka jingkylli bynrap u Bah Ardent halor ka jingsiew ïa ka bai lutksan sha ki nongtrei ka MCCL , u Bah Sniawbhalang u la ong ba ka jingsiew ka dang sah satang ka bynta kaba khatduh ban siew, ïa kiba shalan (supplier) la dep siew lut, ïa ki nongtrei Sorkar pat ka dang sah sa T.27.36 klur tam bad kane ka dei ka bynta ba khatduh ban siew na ka bynta u snem 2026-2027.
U Myntri Rangbah ka Jylla u Conrad Sangma haba jubab ïa ka jingkylli u Bah Renikton Lyngdoh Tongkhar MLA ka Mawkyrwat u la ïathuh ba ka Sorkar ka dang ïakren bad ki nongïalam jong ka Hima Sohra ban pynkylla noh ïa ka MCCL sha ki jaka jngohkai ne ki Hotel, ki Resort.
