Shillong, Nailur 12
Ki pulit ka Mawryngkneng ha ka sngi Thohdieng ka 12 tarik u Nailur 2025, ki la ïoh kem ïa u wei u rangbah ïa u ba la suba donkti wiang ding ïa ka Ïingmane Presbyterian jong ka Pomlahier.
Kane ka jingjia shah wiang ding katei ka Ïingmane kadei ha ka 15 tarik u Nailar 2025, ha ki por kumba 2 baje eiei mynstep. Ka kyrwoh na u Superintendent of Police, East Khasi Hills, u Bah Vivek Syiem u la pyntip ba ha ka 16 tarik u Nailar 2025, ki pulit ka Mawryngkneng ki la ïoh pdiang ïa ka ejahar kaba la ujor da ki nongïalam ka Balang Presbyterian, Pomlahier bad ïathuh ba ha ka 15 tarik u Nailar 2025, ha kapor 2 baje mynstep, la don kiba wiang ding ïa ka Ïingmane, ha kaba ki dieng, ki plastik bad ka madan ba la siang da ka dieng ki la julor lut.
Hadien kane, ki pulit ki la ‘rejister case’ ha Mawryngkneng Police Station ha ka case number 34(08)2025 U/S 326 (g) jong ka BNS. Ha ka jingtohkit la lap ba kane ka jingjia ka dei ka jingjia ha ka sien kaba ar bad u wei u briew ba la tip kyrteng u Bajiedstar Kharsati la suba ba u la donkti ban leh ïa kane ka kam thang ïa katei ka Ïingmane.
Ha ka 11 tarik u Nailur 2025, la ïoh jingtip ba ka la don biang ka jingpynpait ïa ka jingkhang ïit jong ka Ïingmane bad ha ka jingtohkit, la ïoh jingtip ba u Bajiedstar Kharsati, 47 snem ka rta u dei uba la pynpait ïa ka jingkhang ïit, bad namar ka jingsheptieng ba ïoh shah ktah kti ha ki paidbah u la phet noh sha khlaw.
Hadien ka jingwad bad thwet ki bor pulit ka Mawryngkneng u la shah kem noh ha ka 12 tarik u Nailur 2025, bad la ïalam ïa u sha Mawryngkneng CHC na ka bynta ban khmih ïa ka koit ka khiah jong u.
“Ha ka jingkhmih bad peitbniah ïa ka koit ka khiah, la lap ba u ne u rangbah um biang ha ka pyrkhat pyrdaiñ ne ktah khlieh, bad la ïalam noh ïa u sha MIMHANS hospital bad mynta u dang shah sumar ha kane ka hospital” la ong u SP.
