Shillong, Nailur 12
U Myntri Rangbah barim ka Jylla, u Dr. Donwa Dethwelson Lapang, ïa uba ju tip paidbah kum u Dr. D.D. Lapang u la khlad noh ha ka 12 tarik Nailur, 2025 ha Bethany Hospital, Shillong namar ka jingshitom kaba la ban la kham slem.
La kha ïa u Dr. Lapang ha ka 10 tarik Ïaïong, 1933 bad u dei u khun jong u Bah Donwa War. U la sdang ïa ka jingim jong u kum u nongbylla surok bad u la trei minot haduh ban da long u Sub-Inspector jong ki skul.
Ha ka snem 1958, u la shongkurim ïa ka Kong Amethyst Lynda Jomes Blah bad u don 2 ngut ki khun.
Ha u snem 1972 u la long MLA na Nongpoh kum u kyrtong shimet. Hadien kane, ha u snem 1992 haduh u bnai Rymphang, 1993 u la long kum u Myntri Rangbah ka Jylla.
Ha ka 4 tarik u Lber, 2003 la pynsmai biang ïa u kum u Myntri Rangbah ka Jylla. Hynrei u la iehnoh kam ha ka 15 tarik u Jylliew, 2006 namar ka jingïapher jingmut ha ka Sorkar Synrop.
U la shimti biang ïa ka kam kum u Myntri Rangbah ha u Lber 2007.
Ka seng jong u, ka Indian National Congress (INC), ka la jop ha bun tylli ki konstitwensi ha ka ilekshon sha ka Ïingdorbar Thawaiñ ka Jylla ha u Lber 2008, bad u Dr. Lapang u la bam smai kum u Myntri Rangbah ha ka 10 tarik u Lber 2008, hynrei da ka jingkyrshan tang jong 28 ngut ki dkhot ha ka Ïingdorbar kaba don 60 ngut ki dkhot, u la iehnoh kam ha ka 19 tarik u Lber.
U la long Myntri Rangbah ha ka sien kaba saw ha ka 13 tarik u Jymmang, 2009, hadien ba ka Jylla ka la don hapoh ka jingsynshar President na bynta ar bnai, bad u la iehnoh kam ha ka 19 tarik u Lber, 2010.
Shuh shuh u la ïakhun ban pynïoh ïa ka Ri-Bhoi ïa la ka jong ka distrik bad kane ka la urlong ha kaba ka Ri-Bhoi ka la ïoh la ka jong ka distrik bad u la wanrah shibun ka roi ka par ha ryngkat kiba bun ki jingkylla.
U Dr. Lapang u la neh la bun-bun snem bad ka Congress bad u la bat kum u MLA ka Nongpoh haduh ba un da shongthait ha u snem 2018. Hadien kane, u la pynïasoh noh sha ka NPP.
