Shillong, Nailur 12
U Bah Disparsing Rani u nongwad RTI u la ther tyngeh ïa ka tnad pulit ba kam lah ban ai jubab ïa ka RTI kaba u la pan halor kino ki heh sorkar kiba lah ban pynpah sairen, kiba lah ban tah ïit-ïong bad halor ka jingshah daiñ kuna, ki kali tah ïit-ïong jong ki riew paidbah.
U Bah Rani u la ong, ki pulit ki sngewtynnad tang ban ñion bad ban ïuhroid ïa ka hok ki paidbah. U la pynpaw ba u la pan RTI naduh ka 5 tarik Nailur 2024 hynrei haduh mynta ka tnad pulit kam shym la jubab, u la dawa ruh ba ka tnad pulit ka dei ban jubab noh mardor lym kumta un leh da kaba tyngeh ha kaba kin hap ban siew ïa ka kuna kaba long 250 tyngka shisngi.
“Ha ka jingshisha katkum ka Motor Vehicle Act 1988, ki kyndon ki kdew, ba kiba tah ïit-ïong ka dor jong ka kuna ka dei 100 tyngka ha ka sien ba nyngkong, ha ka sien kaba ar 300 tyngka, hynrei hangne ha ka jylla jong ngi ki shim ïa ka kuna 1000 tyngka ïa ki riew paidbah ba tah ïit-ïong, ka long kaba sngewsih ba ki pulit, ha ka jaka ba kin bat ïa ka aiñ, ki pynkheiñ aiñ pynban” la ong u Bah Rani.
U Bah Rani hadien ba u la ïoh ïa ka jubab RTI halor ka jingsiew ‘Honorarium’ ka sorkar ïa ki nongtrei ka Meghalaya Public Service Social Audit, u la kynnoh ba ka Meghalaya Public Service Social Audit ka ba la thaw da ka sorkar ka la kylla long tang ka ophis ïabam bad pynsyrwa kai ïa ka pisa paidbah.
U la ong ba ka jingïoh bainong kaba tang 12,000 ha ka shibnai, jong ki 54 ngut ki Block Social Audit Resource Person ka la buh jingeh shibun ïa ki, namar tang kane ka jingsiew kaba rit ki hap ban leit sha ki block ban pynlong ka jingtohkit ïa ki skhim sorkar bad kane ka jingsiew ka duna eh.
Halor kane u la buh ka jingkyntu ïa sorkar ba kan pynheh noh ïa ka tulop jong ki, katkum ba ka sorkar ka la kular.
