Shillong, Nailur 12
Ka Hynñiewtrep Youth Council (HYC) sengkmie hapoh ka jingïalam u Bah Roykupar Synrem, President ha ka 12 Tarik u Nailur 2025, ki la leit ban ïakynduh ïa ka Surgeon Superintendent (S.S) Civil Hospital, Shillong ka Dr.Paswet halor ka jingujor ba la ïoh na kiba bun ki nongshah sumar.
Haba kren sha ki lad pathai khubor u Bah Roykupar Synrem u la ong ba ki nongshah sumar ha Civil Hospital kiba donkam ban phah puid na ka bynta ka jingkoit jingkhiah jong ki, hynrei na ka liang ki doktor pat ki phah wan noh ha kiwei pat ki sngi.
U Bah Roykupar u la ïathuh ba ki doktor ki la pynsangeh ïa ki nongpang ban puid wat hadien ba ki la buh ïa ka tarik ban puid ruh.
U la ong ba bun ki paidbah ki mad ïa ki jingeh na ka daw ba ki doktor ki pynsangeh puid, da kaba ong ba haba ki doktor ki la buh ha kata ka sngi ba kin wan ban puid hynrei ynda ki nongpang ki la wan ki dang pynkynriah shuh-shuh ïa ka tarik puid bad ban ai daw ruh ba kim lah ban leh.
” Haba u nongpang u donkam ban puid noh namar la sngewthuh, ba uba wan phah puid u dei uba don ha ka jingshitom kaba jur hynrei ki doktor pat ki pynslem da kaba bthah ba kin wan ha kawei pat ka sngi” la ong u Bah Roykupar.
U la ïathuh ba kiba bun ki paidbah kiba wan ban phah sumar ki la phone ban ïathuh, ba na ka liang ka Civil Hospital ha ki tnad bapher bapher ki shait buh ïa ki sngi ban puid ïa ki nongpang, hynrei ynda lah poi ha kata ka sngi, ba dei ban puid ki pynsangeh kynsan da kaba ong ïa ki nongpang ba kin sa wan biang ha kawei pat ka sngi.
“Ki don ki nongpang kiba na ki shnong nongkyndong kiba jngai kiba hap ban sah ha ïing ki bahaïing hasem bad ban pynlut ïa ka pisa ka tyngka ban shah sumar da ka jingkhmih lynti kumba u doktor u la buh ïa ka tarik ban puid, hynrei ynda la poi pat ha Civil Hospital ki la shah pynsangeh noh bad shah pynphai noh sha la ki ïing ki sem, bad ki doktor ki aidaw ba kim lah ban puid ha kata ka sngi, bad phah wan noh ha ki sngi ba bud. Kane ka buh jingeh bad ym dei tang ha ka bor pyrkhat jong ki hynrei ki hap ban ap biang da ki bnai ban ïoh biang ïa kata ka lad ka lynti ban ïoh ïa ka jingsumar” la ong u Bah Roykupar Synrem.
Shuh shuh u la ong ba kane ka ktah ïa ka pisa ka tyngka jong ki, namar kiba wan shah sumar hapoh Civil Hospital la sngewthuh ba kidei ki briew kiba wan na ka longïing kiba duna ha ka ïoh ka kot.
Na ka liang ka Dr.Paswet ka la ïathuh ba kadaw ba pynkynriah ïa ka sngi puid ïa ki nongpang kadei namar ba ka don tang kawei ka jaka puid bad kumta ki hap ban pynkynriah ïa ki, la ong u Bah Roykupar Synrem.
Kumta u Bah Roykupar u la kyntu ïa ka doktor ban ïakren bad ki bor Sorkar, ban buh biang ïa ki jaka puid ha Civil Hospital, khnang ba kan long ka jingïarap na ka bynta ki nongshah sumar bad ba kan nym jia shuh kum kane ka jingjia.
