Moscow, Nailur:
Ka Russia ha ka Sngi Thohdieng, ka la pyntip ba ki drone jong ka Ukraine ki la leit ban thombor ia kawei ka jaka ai jinghikai ha Zaporizhzhia Nuclear Power Plant ha Sngi Palei, wat hapdeng ki jingpyrshang ba ratbah jong ka US ban wanrah noh ia ka jingiasuk hapdeng ka Russia bad Ukraine.
Hynrei la ong ba ym shym la ioh jingtip ban don kino- kino kiba ngat ne mynsaw ha katei ka jingjia bad ia ki jingtip ba bniah yn sa lah ban pynshai ynda la ioh ban peit-thuh bha ia ka jinglong- jingman ha katei ka jaka.
Ka Reuters kam shym la lah ban pynshisha hi dalade ia katei ka khubor.
Ka Director jong katei ka karkhana, ka Yevgeniya Yashina, ka la iathuh ha ki lad pathai khubor jong ka RIA, ba kum kine ki jingshah thombor ki wanrah ka jingma kaba khraw bad ki long ruh ki jingleh pyrshah ia ki aiñ ba la bun bym bit ban pynthud ne pynsniew ia ka jingshngaiñ jong ki shlem Nuclear. Ka jaka ai jinghikai ka jngai tang 300 meter (1,000 phut) na ki reactor bad ka jingleit thombor ia kitei ki jaka treikam, ka lah ban wanrah ia ka jingma ka bym lah shuh ban tehlakam.
Ki bor pyniaid jong katei ka karkhana ha Russia, ki la iathuh ia katei ka jingjia ha ka Sngi Saitjaiñ ba la dep. Ka la ong ba ki drone jong ka Ukraine ki la leit bthei ha ka tnum jong katei ka jaka ai jinghikai hynrei kam shym la don kano- kano ka jingjulor kaba khraw bad kam shym la don ruh ka jingkiew ha ka jingkhluit jong ka radiation ha katei ka jaka.
Kum ban shu pynkynmaw, ba ki shipai jong ka Russia ki la ioh kurup ia katei ka shlem Nuclear Zaporizhzhia ha ki taïew ba nyngkong jong ka jingleit hiar thma ka Russia sha Ukraine ha u Rymphang jong u snem 2022. Ha kaba, baroh arliang ri ki ju ia kynnoh bad kdew kti markylliang haba iadei bad ka jingsniew ha ka jinglong- jingman hapdeng jongki bad ka jingiakynad ne jingia-shrut hapdeng jongki naduh ba ka Ukraine ka la ïakhun pyrshah ia ka Ukraine naba sdang jong ka thma.
