Shillong, Nailur 12
Ka jingdon jong ki mukotduma kiba shah pynngat hapoh ka Protection of Children from Sexual Offences (POCSO) Act, ha ka Jylla ha kine ki 5 snem ba la dep ka long 1562 tylli.
Baroh ki don 261 tylli kiba la pynngat mukotduma ha u snem 2025, 265 tylli ha u snem 2024, 320 tylli ha u snem 2023, 347 tylli ha u snem 2022 bad 369 tylli ha u snem 2021.
Ïa kane la pyntip da u Myntri ka tnad Social Welfare, Bah Paul Lyngdoh ha ka jubab jong u ba la wanrah hapoh Ïingdorbar ha ka Sngi Thohdieng. U la pyntip ba baroh ki mat kiba ïadei bad ka jingïada ïa ki khynnah, ka jingkyrshan ïa ki, ka jingïasyllok, ka jingpynbha bad kiwei-kiwei ki kam ba ïadei bad kane ki don hapoh ka jingkhmih jong ka tnad Social Welfare, kaba pyntreikam ïa ka skhim ‘Mission Vatsalya’, kaba don ïa ka State Child Protection Society (SCPS) ha ka kyrdan jong ka Jylla bad ki District Child Protection Unit (DCPU), ‘Children’s Homes’ bad ‘Child Helpline’, ki ‘Child Welfare Committee’ lem bad ki ‘Juvenile Justice Board’ ha kyrdan jong ki distrik.
Ka tnad ka biang ha ka liang ki nongtrei bad ka pisa ban ai ïa ka jingshakri kaba paka sha ki khynnah. Baroh ki jingthung kam ïa ki nongtrei hapoh ka ‘Mission Vatsalya’ ki long ha ka rukom jong ka kontrak.
