Shillong, Nailur 12
U Limison D. Sangma, uba long ruh u nongmihkhmat ka NPP la 3 sien kynthih na Raksamgre ha ka Sngi Thohdieng u la shah jied kum u Symbud Lamphang bathymmai ka Ïingdorbar Thawaiñ ka Jylla khlem kano-kano ka jingïakhun.
Haba pynbna ïa kane, u Lamphang ka Ïingdorbar Thawaiñ, u Thomas A. Sangma u la ong, “Namarba la ïoh pdiang tang ïa kawei ka ‘Nomination Paper’ bad la lap ba ka long kaba biang, nga pynbna ïa u Limison D. Sangma ba u la shah jied kum u Symbud Lamphang jong ka Ïingdorbar Thawaiñ ka Meghalaya.”
Hadien kane, la synran lang ïa u Limison da u Myntri Rangbah ka Jylla, u Conrad K. Sangma bad u Nongïalam ka Liang Pyrshah, Dr. Mukul Sangma sha ka jaka shong jong u, kaba long kum ka jingpdiang burom ïa ka jingsdang jong ka kam bathymmai jong u.
U Lamphang u la ai ka jingpdiang sngewbha ïa u Limison D. Sangma sha ka kam bathymmai jong u, da kaba pynpaw ïa ka jingkmen lang hadien ka jingshah jied jong u.
“Nga pdiang sngewbha ïa phi sha kane ka ophis trekam ba ha khliehduh. Ryngkat lang, ngin ïaleh ban pynneh ïa ka burom, ka jingtreikam ba beit ba ryntih, bad ka jingkynthup lang jong ka Ïingdorbar, da kaba pyntikna ba kan ïai bteng ban ïeng kum ka jaka ba kyntang ba shisha jong ka synshar paidbah na bynta ki paid nongshong shnong ka Meghalaya,” u la ong haba kdew ba ka jingshah jied jong u khlem kano-kano ka jingïakhun kum u Symbud Lamphang ka pynpaw ïa ka jinglong kongsan jong kane ka sngi ha ka khana sah kynmaw jong ka Ïingdorbar.
“Ka bynta jong u Symbud Lamphang kam dei tang ban ïarap ïa u Lamphang ha ka jingpynïaid kaba ryntih hynrei ban kynthup lang ïa ka dor jong ka jinglong pdeng, ka burom bad ka rukom synshar paidbah,” u la bynrap.
U Limison Sangma u la pynpaw ïa ka jingsngewnguh bad ka jingsngewrit hadien ba u la shah jied (khlem don ba ïakhun pyrshah) kum u Symbud Lamphang.
“Nga la ïoh jinghikai ba ka jinglong nongïalam ba shisha kam dei ban bat ïa ka bor, hynrei ban shakri ïa ki paidbah da ka jingsngewrit bad ka jinglong hok,” u la ong haba ai khublei ïa ki paidbah ka Raksamgre, ka seng jong u, bad ïa u Myntri Rangbah ka Jylla na ka bynta ka jingkyrshan bad jinglam lynti jong ki.
U Symbud Lamphang bathymmai u la kular ruh ban pyntikna ba man la ki dkhot la ki dei na ka Liang Pyrshah ne Sorkar, kin ïoh ïa ka lad ka kabu kaba mar katjuh ban ïoh pynsngew bad ba man la ka sur ka long kaba kongsan.
U la pynpaw ruh ïa ka jingangnud ban ïatreilang bad baroh ki dkhot kumjuh ban pyntikna ba ka Ïingdorbar kan treikam da ka burom bad ka jinglong hok.
Shuh shuh u Limison u la ban jur halor ka jingdonkam ka jingmihkhmat jong ki sur bapher-bapher jong ki jaidbynriew Khasi, Jaiñtia, bad Garo, bad u la kular ban pynlong ïa ka Ïingdorbar kum ka jingpynpaw ba shisha ïa ki nongrim jong ka synshar paidbah.
