Visakhapatnam, Nailur:
Ki la don haduh 144 ngut ki nong Telugu, kiba sahkut ha Tribhuvan International Airport ha Kathmandu, Nepal, ki la lah ban poi suk sha Andhra Pradesh da ka jingkyrshan jong ka sorkar Jylla.
Kane ka kynhun, kaba la shah kem ha kaba nyngkong eh ha ka jingïakynad paidbah kaba dang ïaid shakhmat ha Nepal, ka la mih na Kathmandu da ka liengsuiñ kyrpang jong ka IndiGo, kaba kyrteng 6E 9511.
Kane ka liengsuiñ, kaba la thmu ban mih ha ka por 3 baje mynstep, ka la pynslem, bad ka la kiew ha ka por 4.15 baje janmiet, ha kaba ka la poi ha Visakhapatnam ha ka por 6 baje janmiet.
Kane ka liengsuiñ kaba kyrpang ka la sangeh nyngkong eh ha Visakhapatnam, ha kaba 104 ngut ki nongleit nongwan ki la hiar na ka liengsuiñ. Kiba sah sa 40 ngut kin hiar ha ka kad liengsuiñ Tirupati.
Napdeng ki nongleit jingleit, ki don 36 ngut na Visakhapatnam, 39 ngut na Vizianagaram, 8 ngut na Srikakulam, 9 ngut na Manyam, 4 ngut na Kaki-nada, 1 na Anakapalli, 13 ngut na Mangalagiri, Rajahmundry bad Guntur bad 34 ngut na Tirupati.
U Myntri ka tnat HRD bad ka tnat IT, u Nara Lokesh, uba la peit ïa kane ka jingtrei baroh kawei na ka RTGS Command Control Centre ha Amaravati, u la pynïaid beit ïa kane ka kam pynlait im.
U la pynthikna ba la pynbeit lut ïa ki jingdonkam baroh na ka bynta ka jingwanphai biang jong ki briew Telugu da kaba suk.
U Palla Srinivasa Rao, President ka TDP State bad u MLA ka Gajuwaka, haba kren ha kad liengsuiñ jong ka Visakhapatnam, ula ïaroh ïa ka jingtrei shitom jong ka sorkar Jylla.
Ki briew jong ka Telugu, kiba la wanphai na Nepal, kiba la shah lynshop ha ki jingeh, ki leh ïa ka ‘Ksheerabhishekam’ ha ka dur jong u Nara Lokesh, Myntri ka tnad IT, ha kad liengsuiñ ha Vizag.
“U Lokesh u la pynbeit lut, da kaba wanrah ïa ki briew na ka thaiñ Uttarandhra jong ngi sha Visakhapatnam, bad pynthikna ïa ka jingkit jingbah jong ki sha la ki jong ki jong ki jaka ba ki leit.
Ka TDP ka trei beit na ka bynta ka bha ka miat bad ka jingbha jong ki briew Telugu,” u la pynskhem.
U la kdew ruh ïa ki jingjia kiba la dep ha kaba ka TDP ka la shimkhia ban ïarap ïa ki briew Telugu ha ki por ba don ki jingeh.
“Ha ki por ba don ki jingjia ba sngewsih kum ka jingshlei um ne ka thma Ukraine, ka TDP ka la ju ïeng kum ka jingkyrshan na ka bynta ki briew Telugu.”
Hadien ba ki la wan phai suk, ki nongleit nongwan ki la pynpaw ïa ka jingsngewnguh ïa u Lokesh.
Ha ka jingleh kaba pynsngewsih, katto katne na ki nongwanphai ki la leh ïa ka ‘Ksheerabhishekam’ (ka jingainguh tynrai jong ka dud) ïa ka dur jong u Lokesh ha kad liengsuiñ kum ka dak ka jingsngewnguh ïa ka jingpyrshang ba khlem sangeh jong u ban pynthikna ïa ka jingwanphai jong ki da kaba suk.
Kawei na ki nongleit jingleit, ka Shiva Kumari na Yendada, kaba la leit sha ka jingleit mane blei sha Nepal ryngkat bad ki 80 ngut kiwei pat, ka la ïathuh ïa ka jingshem jong ka bad ka lad pathai khubor.
“Ngi la leit sha Nepal na ka bynta ban leit jngoh ïa ki temple, bad baroh ki la ïaid beit haduh ba ngin da poi ha Kathmandu. Shisien ba ngi la poi, ngi la tip shaphang ka jingkulmar paidbah, bad ngi la tieng la ngi lah ne em ban wan phai sha la ïing da kaba suk. Ym shym la don ki Signal mobile kiba biang, hynrei kumno re kumno ngi la lah ban ïakynduh ïa ki khun jong ngi, bad ka AP. Sorkar Pradesh na ka bynta ban wanrah biang ïa ngi da kaba suk,” ka la ong.
Ka Julie na Midhi-lapuri VUDA Colony, ka la pynkynmaw ïa ka jinglong jingman kaba ka la ïakynduh.
“Nga la leit sha Nepal ha ka 3 tarik u Nailur. Dei tad haduh ba ngi la poi ha Kathmandu ba ngi la tip shaphang ka jingkulmar. Ngi la shah khang hapoh ka hotel ryngkat bad ka jingpynjari Curfew, bad ngim shym la lah ban mih shabar na ka bynta ka jingshngaiñ jong ngi. Ka jingïarap ïa ngi,” ka la ong.
Ka sorkar Andhra Pradesh, ka la thaw ïa ka Help Desk ha AP Bhavan ha New Delhi, ha kaba kan dang treikam haduh ba u Telugu ba khatduh, uba sahkut ha Nepal, un da wanphai biang da kaba suk.
Ka RTGS Centre ka la ïatreilang bad ka Nepal Embassy, ka sorkar pdeng, bad ki bor synshar shnong ban pynthikna ïa ka jingwanphai biang jong baroh ki nong Telugu kiba sahkut.
Ka jingpyrshang jong u Lokesh ka la long kaba kongsan ha kaba pynbeit ïa ka jingpyllait im.
La pynbeit ïa ki liengsuiñ ba kyrpang, kumjuh ruh ïa ki jingkit jingbah ha surok, ban pynpoi biang ïa ki Telugu kiba sahkut sha la ïing.
Ka sorkar AP ka la pynthikna ba baroh ki sienjam kin dang ïai bteng ban wanrah biang ïa ki briew Telugu kiba dang sahkut kiba dang sahkut ha Nepal.
U Myntri Rangbah ka Jylla N Chandrababu Naidu u la pynpaw ïa ka jingsngewnguh ïa ka sorkar pdeng, bad ki kynhun jong ki Jylla halor ka jingjop ban pynkynriah ïa ki briew Telugu kiba sahkut ha Nepal.
Haba pynmih khubor ha ka rynsan X, u Naidu u la ong ba u “kmen ban ïohi ba ka jingpyllait im ïa ki briew Telugu kiba sahkut na Nepal ka la sdang da kaba jop, kaba pynïasoh biang ïa ki bad ki bahaïing hasem jong ki.”
U Myntri Rangbah ka Jylla ula ïaroh ïa ka jingïatreilang jong u Myntri IT Nara Lokesh, u V Anitha Myntri Kam Pohïing, ka Myntri kam jngohkai pyrthei ka Kandula Durgesh, ka Team RTGS, Team NRT, bad ki ophisar jong ka AP Bhavan.
U Naidu u la pynpaw ïa ka jingpyrshang ba khlem sangeh jong ki, ka jingpynkhreh kloi, bad ka rukom leh kaba sngewrit ha kaba pynthikna ïa ka jingwanphai biang jong ki briew Telugu kiba shah ktah na Nepal.
