Shillong, Nailur 12
U Symbud Myntri Rangbah ka Jylla u Bah Prestone Tynsong uba dei ruh u Myntri ba dei peit ïa ka tnad kam pohïing ka Sorkar Jylla, u la ong ba ka jingpynslem ban pynkynriah ïa ka jaka shong ba shipor ki CRPF na Mawlai ka dei namar ba ki don ki nongshong shnong kiba don ha New Shillong ki pyrshah ban tei ïa ka jaka sah bathymmai ki shipai CRPF namar ki tieng ba ki dei ki shipai jong ka Sorkar Pdeng.
Ïa kane u la kren haba jubab ïa ka jingkylli ba la buh da u MLA ka Mawlai Constituency u Bah Brightstarwell Marbaniang ha Dorbar Synrai kaba la kut mynta ka sngi halor ka jingpynslem ban pynkynriah ïa ki CRPF na Mawlai kaba la neh da kiba bun-bun snem.
U Bah Prestone u la ong ba ha u snem 2022 ka Sorkar ka la thmu ban shim ïa ka jaka ba 10 akar kaba don ha kawei ka shnong ha New Shillong bad hashwa ban ïasoi ïa ka Memorandum of Understanding (MoU) ki don ki nongshong shnong katei ka thaiñ kiba pyrshah jur ïa kane ka jingthmu ban buh ïa ka jaka shong ki shipai CRPF ha katei ka jaka.
U la pynshai ba ki paidbah ki dei ban pynduh ïa ka jingtieng ïa ki shipai CRPF namar ba kine ki shipai la ai bor da ka Sorkar Pdeng ba ki Sorkar Jylla kin pyntreikam ïa ki ha kano-kano ka por da kaba ong ba ki CRPF ki dei kiba lajan pyntreikam pura da ka Sorkar Jylla.
Shuh shuh u la ong ba ki CRPF ki ïapher shibun na kiwei pat ki shipai ka Sorkar Pdeng namar ba la pynïaid ïa ki da ka Sorkar Jylla bad ka jaka ban shna ïa ki jaka sah ki CRPF ruh ka dei ba la long trai da ka Sorkar Jylla hi ym ba kin longtrai ma ki.
Kumta u la kyntu ïa ki MLA ba kin pynsngewthuh ïa ki paidbah ba kim dei ban tieng ïa ki CRPF bad kumjuh u la kyrpad ïa u MLA katei ka thaiñ ban ïarap ïa ka Sorkar ban pynsngewthuh ïa ki paidbah khnang ban pynurlong ïa ka jingthmu jong ka Sorkar.
