Washington, Nailur:
U Commerce Secretary jong ka US, u Howard Lutnick, u la ong ba ka United States kan sa “pynbeit” ia ka jingiateh khaïi- pateng bad ka India, ynda ka India ka la sangeh noh ban thied ia ka umphniang Russia.
Ha ka jingiakren bad ki nongthoh khubor ha ka Sngi Palei, u Lutnick u la ong, “Ngin sa pynbeit ia ka India. Phi tip, ka India ha ka nongrim ka hap ban plie ia ka iew jong ki, ka hap ban sangeh noh ban thied ia ka umphniang Russia.” Kane ka jingkren jong u Commerce Secretary ka wan hapdeng ki dak ki shin jong ka jingpynkhreh ïa ka jingïakynad ha ka khaïi pateng hapdeng ka US bad ka India.
Haba pynkynmaw biang ia ki jingkynnoh ba u la kren mynshwa, u Lutnick u la ong ba ka India kam shym la thied ia ka umphniang na Moscow shwa ban sdang ka thma hapdeng ka Russia bad ka Ukraine. U la pynskhem, shwa ka thma, “1 percent na ka umphniang jong ki ka dei na Russia” bad mynta namar ba ka US ka la pynjari ia ka, ka jingbun ka la kiew sha ka 40%.
“Kumta, ki dang thied ia ka, ki pynkhuid ia ka, bad nangta ki die ia ka sha ka pyrthei baroh kawei bad ki shna ia ka kynhun. Kumta, u president (Trump) u la khot ia ka jingkren bein halor kata bad u la ong ba phi dei ban sangeh noh ia kata ka jingbam. Kumta, nga pyrkhat ba ka India ngin sa pynbeit ia ka shisien ba ki la sangeh noh ban thied ia ka umphniang Russia”, la bynrap shuh shuh u Lutnick.
Ha kajuh ka por, ha ka sngi thohdieng, U Trump, ula thoh ha ki social media, ba ki ar tylli ki ri, ki dang “bteng ïa ka jingïakren” ha kaba ïadei bad ki jingkhanglad ha ka khaii pateng bad ba kan ym don “ka jingeh ban poi sha ka jingpynkut kaba jop” ha ka jingïakren khaii pateng.
“Nga sngewkmen ban pynbna ba ka India bad ka Ri America ki dang bteng ïa ka jingïakren ban weng ïa ki jingeh ha ka khaii pateng hapdeng ki ar tylli ki Ri jong ngi. Nga khmih lynti ban ïakren bad u paralok ba bha tam jong nga, u Myntri Rangbahduh u Modi, ha ki taiew ban wan. Nga sngew skhem ba kan ym don kano kano ka jingeh ban poi sha ka jingpynkut kaba jop na ka bynta baroh ar tylli ki ri jong ngi!”
Ha u bnai ba la dep, u Trump, u la buh da ka khajna kaba 25%, halor ka khajna, kaba 25% kaba u buh kylliang, kum ka “jingpynshitom” na ka bynta ban thied ia ka umphniang jong ka Russia.
U Myntri Rangbahduh ka ri, u Narendra Modi, u la jubab ïa ka jingthoh jong u halor ka X, da kaba thoh ba ki ar tylli ki ri ki dei ki “paralok ba kynja mariang” bad ba u ngeit skhem ba ka jingïakren ha ka khaïi pateng kan ïarap ban plie ïa ka jinglah kaba khlem pud jong ka jingïatreilang hapdeng ka India bad ka US bad u la pynthikna ba baroh ar tylli ki kynhun ki dang trei ban pynkut noh kloi ïa ki jingïakren.
Ka India ka la khot ia katei ka jingpynshitom kum ka “bym don nongrim bad bym don jingmut” bad ka la pynskhem beit ba ka ri kan thied ia ka umphniang na kano kano ka jaka ba ka ioh ia ka jingiateh kaba bha tam.
Shi taiew mynshwa, u Lutnick u la kren kham tyngeh halor ka India ha ka Bloomberg. U la ong ba watla ka India ka don ia ka nongrim kaba khlain ban ailad ia ka jingpynbor jong ka US ban nym thied ia ka umphniang jong ka Russia, hynrei ha kaba kut kan sa wan biang ban iateh ia ka khaii pateng bad ka United states hadien khyndiat bnai.
