Shillong, Nailur 14
Ka jingjah jong kawei ka heprit ba la tip kyrteng ka Insaphira Lyngdoh Mawnai, ba dang 4 snem ka rta na ka ïingsah kaba don ha Nongrah Nonglum (brei) ha ka step jong ka sngi U Blei, ka la pynsngewsih kthang ïa ka longïing jong katei ka heprit bad khamtam eh ïa ki kmie ki kpa jong ka.
Haba buddien halor kane ka khubor na ka liang u Nongsaiñ Hima u la ïoh ban ïakren bad uwei u khynnah uba sah marjan bad uba la wan poi sha katei ka ïing hashwa ba ka Insaphira kan jah na la ïing.
Ha ka jingïakren bad une u khynnah, u la ïathuh ba man ka por u ju leit kai sha katei ka ïing jong ka heprit Insaphira. Kumta ha ka step sngi U Blei ruh u la leit kai biang sha ïing jong ka ban ïalehkai.
Une u khynnah u la ïathuh ruh ba u la leit sha ka ïing jong ka Insaphira ha ka por 8 baje eiei mynstep bad ka Insaphira ruh ka dang ïalehkai ha phyllaw ïing, da kaba ïathuh ba u mama ruh u dang sait tiar bad u la ong ba in phah phong slipar ïa ka Insaphira namar ba ka ktieh palat bad hadien kata ynda la dep ban phah phong da ka slipar u la leit buh biang ïa ka Insaphira shapoh ïing.
Shuh shuh u la ïathuh ba ka don kawei ka kali Scorpio rong ïong ka bym don ïa u Nombar Plate, kaba ïeng ha madan kaba dei marjan ruh bad ka ïingsah jong ka heprit Insaphira bad ha ka por ba u la mut ban leit phai noh sha ïing lajong, hynrei la wan noh ka kmie jong ka Insaphira ban ïathuh ha u, ba i Insaphira im don shuh ha ïing bad i la jah.
Nalorkata, u ïathuh ba hapoh katei ka kali Scorpio rong ïong ki don ki briew kiba ïa dih kyiad ki bym ithuh dur.
“Mar kumta hi nga la leit ban wad lang ïa i Insaphira ryngkat ki paidbah,” la ïathuh utei u khynnah.
Une u khynnah u la ïathuh shuh shuh ba kumba u ju leh man ka por ba haba u leitkai sha ïing jong ka Insaphira, u shu kiew beit na jrong ka kynroh ba la ker ïa ka ïing bad u la ong ba ka gate kam pat plie, katba u tala ba khang ïa ka gate pat u lah dep plie lypa bad ha ka por ba u mih ban leit phai sha ïing lajong ruh u la shu kiew na jrong ka kynroh.
Kum ban shu kdew hangne ba naduh ka por 8 baje eiei ba ka heprit Insaphira ka la jah na la ïing, na ka liang ki rangbah ka shnong bad ki samla ki la ïa mih ban ïa wad kylleng kylleng ki jaka ba marjan bad sha jngai ruh hynrei kim shem la lap dien haduh ynda la kem dum.
