Nongpoh, Nailur 14
Kum ka dak jong ka jingsngewlem bad ka jingkynmaw burom ïa u Dr. DD Lapang, ba ju tip ruh kum u kpa ka Ri Bhoi District, uba la khlad noh ha ka 12 tarik mynta u bnai, u Bah Mayralborn Syiem, MLA jong ka Nongpoh ha ryngkat bad ki ‘riewpawkhmat ka thaiñ, ki nongïalam niam, ki kynhun sengbhalang, ki khynnah skul bad ki ‘riew paidbah ha ka step jong ka sngi U Blei, ki la pynlong ïa ka jingïalang duwai kaba kyrpang bad sngewlem ha u motdur ba shirynïeng jong u, ba la tei da ka Young Minds Association ha phyllaw ka Ri Bhoi College, Nongpoh ban pyndonburom khatduh hashwa ka jingleit ontep ïa u ha ka sngi Nyngkong ha nongbah Shillong.
Ha kane ka jingïalang duwai bad sngewlem kaba kyrpang kaba la lamkhmat da u Bah Mayralborn Syiem, la wan ban ïadon ryngkat ka MDC jong ka Nongpoh, Kong Rona Khymdeit, u MDC barim ka Nongpoh Bah Balajied Rani, ki nongïalam ka Ri Bhoi Dorbar ba kynthup ïa u Bah RB Shadap bad u Bah RR Makdoh, ka Principal jong ka skul Alpha English Higher Secondary School Kong WK Blah, ki nonghikai ka Ri Bhoi College, ki nongïalam ka Ri Bhoi Youth Federation, ka Ri Bhoi People’s Council nalor kiwei kiwei.
Ki nongkren ha kane ka sngi kynthup naduh u Bah Mayralborn Syiem bad kiwei kiwei, ki la pynpaw ïa ka jingsngewsih kthang halor ka jingkhlad jong u Dr DD Lapang, uba ki la ong ba ka long ka jingduhnong kaba khraw ïa ka thaiñ bad ka jylla hi baroh kawei bad ïa uba la ju khot ruh kum u kpa jong ka Ri Bhoi District halor ka jingdon bynta ka jong u ban pynïoh ïa ka District kaba pura bad ruh ban wanrah ïa shibun ki kam pynroi ym tang ha Nongpoh konstitwensi, hynrei na ka bynta ka District bad ka jylla hi baroh kawei.
Na ka liang kitei ki nongkren ha ryngkat ki paidbah, ki phah ruh ïa ka kyrwoh sngewlem sha ka lok, ki khun ki ksiew, ka ïing ka sem baroh ba U Blei un pyntngen ïa ki ha kum kane ka por jong ka jingwan taplup u lyoh uba dum ïa ka ïing ka sem bad pynlong ruh ïa ka jingduwai na ka bynta ka mynsiem jong u Dr DD Lapang ba kan ïoh ïa ka jingjahthait kaba shi junom ha ki ksang kti jong U Blei nongbuh nongthaw, Uba la ibit ban shim noh ïa u na kane ka sla pyrthei.
Shuh shuh, ha kane ka sngi, ki nongïalam ba kynthup naduh ki nongmihkhmat, ki seng bapher bapher ki la pynlong ruh ïa ka jingbuh syntiew hakhmat utei u motdur ba shirynïeng jong u Dr DD Lapang kum ka dak jong ka jingburom khatduh.
