Shillong, Nailur 14
I heprit ba dang saw snem ka rta, i la jah rngai noh na la ïingsah mar shu khie na jingthiah ha ka por 8:00 baje duna mynstep jong ka sngi U Blei kaba dei ka 14 tarik Nailur 2025.
Ine i heprit i dei iba la tip kyrteng kum i Insaphira Lyngdoh Mawnai iba shong ba sah ha Nongrah Nonglum Brei, Shillong.
Haba ïakren bad ka Meisan jong ine i heprit, ka la ïathuh ba ine iheprit i leit thiah bad ka ha ka miet jong ka sngi Saitjaiñ namar ki sah lang ha ka juh phyllaw hynrei ha ka por 8:00 baje duna mynstep ine i heprit i la khie na jingthiah bad ma ka (Meisan) ka dang thiah ha jingthiah, hynrei haba u hynmen jong ka kmie jong ine i heprit u mut aisha step u khlem lap shuh.
Ka la ïathuh biang ba ha ka por 8:15 baje mynstep baroh ki la khie lut ban ïa wad ïa ine i heprit.
Ka Meisan jong ine i heprit ka suba jur ba ïa ine i heprit la donkti ban rahbor ki briew kiba nabar.
Shuh shuh ka la ïathuh ba ine i heprit barabor i shait thiah bad ka kmie man ka miet hynrei tang ha ka miet sngi Saitjaiñ i la thiah lang bad ka.
Kumta kiba haïing hasem ki la wad bad pyntip ruh sha ka shnong Nongrah ban wad ïa ine i heprit bad haduh mynta ka janmiet kiba haïing hasem bad ki nongshong shnong ki dang bteng ban wad.
Ine i heprit i dei i khun ba ar jong ka Kong Labantalin Lyngdoh Mawnai bad u Bah Gowelstar Lyngdoh Mawphlang bad ki don uwei u khun shynrang ba dang 9 snem ka rta.
Kumjuh ruh u kpa uba kit ba bah ïa ka ïing ka sem u la mih na ïing ban leit wad ïa la ka jong ka khun kynthei kaba dang saw snem ka rta kaba la jah na ïingsah ha ka step jong ka sngi U Blei.
U kpa jong ine i heprit u la mih na la ïing ha ka por janmiet shwa ban kem dum bad ar ngut kiba haïing kiba la synran ban leit wad sawdong jong ka ïingsah.
