Shillong, Nailur 14
U Bah Charles Marngar MLA ka Mawhati Constituency , u la pynkynmaw ba u Dr. D.D. Lapang u dei u briew u ba biang por, u ba sheptieng ïa u Blei uba smat ban pule Kot Bah bad uba tbit ban ïathuhkhana haba don ba khot ha ki jingïaseng.
U Bah Charles u la ong, u Bah Lapang haba u leit ha kano kano prokram watla kaba rit ruh, u ju pynkhreh lypa kumno ban ai jingkren, ban lah ban ai ka symboh jingtip, haba ai jingkren bad ba ki paidbah ne ki khynnah skul kin ïoh ei-ei ynda ki la mih na kata ka jingïalang.
U la iathuh ïa ki jingshem jong u ba, u Bah Lapang u don ka jinglong kaba skhem bad ba neh ha ka nongrim “shisien ba u la ong ho-oid, kaba eh ba un ong em, u long u briew u ba smat ban pule kot khamtam ban pule Kot Bah bad u don ka ‘library’ la ka dei ha ïingsah jong u ne ha ki ïing Sorkar ba u sah ruh”.
U Bah Charles u la ïathuh ba u Bah Lapang, haba u leit peit ïa ki ba pang ba shitom, lada dei ha ki hospital ne ha ïingsah ruh, u ju buh jingdwai ba kyrpang na ka bynta kata ka longïing longsem bad u dei u briew u ba ieid bad u ba sheptieng ïa u Blei, u long u nongïathuhkhana u ba stad bad u ju leit ïathuhkhana kylleng kylleng ki jaka ka Ri Khasi khlem da kheiñ ne buh jingsngewpher lada dei ha kano-kano ka jait ne kynhun balang.
“Ha kawei ka jingkren u Maheh ha Bangalore ha kawei ka jaka pule kaba don 150 ngut ki khynnah Khasi kiba pule, ba la pynlong ïa ki ban jaw ummat na ka jingkren jong u, ha kaba kum kane ka por nga sngew ba ngam lah ban klet ïa ki jinghikai ba u Maheh u la ai ha nga” la pynpaw u Bah Charles .
Haba phai sha ka them Ri-Bhoi u Bah Lapang u la dei u nongmait lynti ban wanrah District, dei u Bah Lapang u ba la pynïoh ïa ka Ri-Bhoi Kolej, u ba la seng skul ban ïoh jingnang jingstad bad ka them Ri-Bhoi ka dei kaba don hapdeng shibun ki jait jingpang, u dei ma u uba khyllie ïa kine ban wanrah jingkylla kumba ka long mynta bad u la dei hok ban ïoh ïa ka nam ka burom kumba la ai nam ïa u kum ‘U kpa ka Ri-Bhoi District”.
“Ka jingkhlad jong u ka long kumba la khyllem noh u diengbah u ba kah syrngiew ïa ka them Ribhoi ba ma ngi, ngi ïoh ban riehtngen, hynrei ym dei ba ka them Ri-Bhoi kan duh mynsiem noh, sngewkmen pat ba shuwa ba une u diengbah un khyllem, u la sei bun ki samla ban long ki nongïalam bad khlem jingartatien ngi dei ban lah ban bud ïa ki dienjat ba u la dep ban saiñdur, la pynpaw u Bah Charles.
U Bah Charles u la ai ka jingsngewlem ïa ka ïing ka sem, na ka jingduh noh ïa u Bah Lapang hynrei u Blei un ai ka jinpyntngen ïa ka ïing ka sem ba un poi suk sha kata ka jaka shongneh kaba u Blei u la pynkhreh.
