Shillong Nailur 14
U Lat ka Jylla u Chandrashekhar H Vijayashankar wat hapdeng ka jingbym lah bha ban ïaid bha namar ka jingshitom, u la poi ha ïing sah u Dr DD Lapang ban pynpaw ka jingngewlem ïa ka jingkhlad noh jong une u Myntri Rangbah barim ka Jylla.
Ha kane ka jingleit ban sngew lem, hadien ba u la dep ban peit ïa ka dur u Dr DD Lapang ba la pynthiah hapoh ka synduk, na ka liang jong u Lat ka Jylla u la ïoh ban ïakynduh ïa ka kurim, ki khun bad kiba haïing ha sem u Dr DD Lapang. Hadien kane, u la Lat u la pynlut ruh katto katne ka por ban ïakren bad ka kurim lem bad ïa u khun bad ïa kiwei kiwei.
U Lat u la pynpaw ka jingsngewsih kaba khraw ïa ka jingkhlad noh u Myntri Rangbah barim ka Jylla bad u la ong, u Bah Lapang u dei u riew khraw, uba la long hapdeng ki paidbah, ka long ka jingduh kaba khraw ïa ki paidbah, khamtam ïa ka Jylla Meghalaya, ym tang ïa ka Meghalaya hynrei ïa ka ka thaiñ lam-mihngi baroh kawei.
“U Bah Lapang u dei u briew u ba la ïoh ka jingburom kaba khraw tam na ki padbah, u ‘riew khraw u ba heh mynsiem,” la ong u Lat.
U Lat u la ong haba u la poi ha ïingsah u Bah Lapang, u la ïoh jingtip ba u Bah Lapang u la don 96 snem tam ka rta bad ka kurim u Bah Lapang kaba la don 91 snem tam ka rta, u la ong ba sa tang saw snem u Bah Lapang u la jan kot ïa ka shispah snem.
U Lat u la ong, u burom ïa u Bah Lapang u ba la long haduh san sien kum u Myntri Rangbah ka jylla Meghalaya.
U Lat u la ong ba u la kyrpad ïa u khun jong u Bah Lapang, ban wan ïalam ïa ka kurim, ki khun, ki ksiew bad ki bahaïing ha sem jong u Bah Lapang hadien shibnai ha Raj Bhavan ba yn ïoh ban pynlong ïa ka jingai burom ïa ka ïing ka sem jong ki ha ka kyrteng jong ka Raj Bhavan.
