Katba nangïaid ki por, ki kam sniew ruh ki la nang jyllei bad nang kham sngew shyrkhei shuh. Kat shaba phai ngi ïohi bad ïoh sngew tang ki kam sniew kiba har rukom haduh ba ki la wanrah ïa ka jingbym long shngaiñ shuh la ha ka leit ka wan, ka trei ka ktah ne ha kiwei kiba bun ki bynta ruh kumjuh. Kaba kham sngew shyrkhei lei ha kine ki por kiba mynta, ka long ba ka don ka jingmih jong kita ki riew sniew, kiba ap thap ban rahbor ïa ki khynnah rit kumba la paw dang khyndiat por ha ka thaiñ Mawlai bad ruh ha kiwei ki bynta jong ka district East Khasi Hills.
Ha ka sngi U Blei ka la don kawei ka jingjia ha kaba iwei i heprit ba dang saw snem ka rta, i la jah rngai noh na la ïingsah mar shu khie na jingthiah khlem tip shuh shano i leit ne don. Kane ka jingjah syndet jong ine i heprit ka la pynklumar khlieh ïa ka ïing ka sem bad ruh ïa ka shnong ka thaw hi baroh kawei. Ki la mih bun ki jingkylli ba kumno ita i heprit ba dang saw snem iba la tip kyrteng Insaphira Lyngdoh Mawnai, in shu jah la ka jah na la ïing, kata na ka shnong Nongrah Nonglum Brei, Shillong. Halor kane ka jingjah rngai kaba kyndit kyndit jong ine i heprit, na ka liang jong ka Meisan jong i, ka la suba jur ba lah ban dei ka jingshah rahbor. Hynrei ym pat lah satia ban pynthikna la ka dei ne em bad ka jingwad ïa i, ka dang ïai bteng. Nalor ka Meisan, la don ruh ki khynnah shnong kiba la pynpaw ba ki la ïohi ïa kawei ka kali Scorpio kaba ïong kaba ïeng hajan ïing shwa ban jah itei i heprit.
Ym lah shuh ban batai ne ban sngewthuh halor kum kine kiei kiei ki jingjia jong ka jingjia rngai. Ym dei kaba dang jia thymmai. Ngi la sakhi bun tylli ki khubor jong ka jingjah rngai jong ki briew ha kylleng ki jaka. Hynrei ngim pat da kham ïoh sngew ba kan don ka jingrahbor ïa ki khynnah rit kumba ki ju paw bha ha kiwei pat ki jylla rithor. Hooid ngim lah ban len ba ki jingsniew hapoh ka Ri Khasi Jaiñtia ruh ki la nang kynrei bha na kawei ka sngi sha kawei pat, la phi phai sha ki kam tuh kam thiem, kam pynïap briew, kam thombor ïa ki kynthei khynnah bad kiwei kiwei. Kiba bun sharum shaneng ki ju ïakren bha ba ki jingsniew kila mih mynta kum ki ‘tit namar ka jingjyllei jong u drok uba la ïoh rung sha ki kyndong kynshrot bad don kiba pynpaw ba ka dei namar ka jingeh ha ka liang ka jingbym ïoh kam ïoh jam shuh. Ngi hap ban wad ïa ki daw tynrai halor kine kiei kiei baroh, ba kaei kaba la pynlong ba kum kine ki jingsniew kin kharoi sted hapoh ka Ri Khasi Jaiñtia.
Ka tnat pulit ka la trei shitom ban kem ïa ki briew ba donkti khaïi bad kurup drok bad kumjuh ruh ïa kiba donkti ha ka kam tuh kam thiem ne ha kiwei kiwei ki kam sniew. Te balei pat nangjur ki kam sniew. Ka paw ba katba nang kem katta nang jur ki kam sniew. Hato dei ba tlot palat ki aiñ pynshitom ïa kito kiba donkti, kaba long pat ka lad ban pynshlur ïa ki ban dang bteng ïa ki kam sniew ne ki don pat da kiwei ki daw. Kumta, donkam kum ki dorbar shnong, ki seng samla, ki seng longkmie lem bad kiwei ki seng ban ïatreilang ryngkat ryngkat bad ki bor ka aiñ bad haba ishankhmat ïano ïano dei ban pyntip mar mar sha ki briew jong ka aiñ ba kin leh ïa kaba donkam. Ngi sngew ruh ba la dei ban pynkhlaiñ noh ïa ki aiñ pynshitom ïa kiba leh kam sniew, ïoh lehse ka lah ban pynduna ïa ki kam sniew.
