Shillong, Nailur 14
Ka jingbujli ïa ki Myntri hapoh ka Sorkar Meghalaya Democratic Alliance – 2 ka shong ha u Myntri Rangbah ka Jylla Conrad K Sangma, bad la sngewthuh ba ha kine ki khyndiat sngi, ka lah ban don ka jingbujli ïa ki Myntri.
Katkum ki tyllong khubor la ong ba ka jingïakren halor kane ka bynta ka la don hynrei ym don pat kiba kwah ban pynpaw eiei bad la ieh beit ka rai ha u Myntri Rangbah bad kumta la khmih lynti ha kine ki sngi ban wan, kan sa don ka jingweng noh ïa ki katto katne ki Myntri ba mynta bad ban wanrah da ka dur thymmai, kum ka sienjam ban ai bynta lem ïa kiwei ba kin don ha ka Kynhun Myntri.
Katkum ka khubor la ong, ki ban shah pynhiar shuki Myntri ki lah ban don kham bun na ka National People’s Party (NPP), mar uwei na ka Bharatiya Janata Party (BJP), Hill State People Democratic Party (HSPDP).
Ki kyrteng kiba kham paw hakhmat ban shah weng ki kynthup ïa u Rakkam A Sangma, Myntri, u Bah Comingone Ymbon, u Bah AL Hek, Bah Shakliar Warjri.
Ka tyllong khubor ka la ïathuh ba ka lah ban don ruh ka jingbujli shuki Myntri na ka United Democratic Party, ha kaba u MLA ka Mairang u Bah Metbah Lyngdoh u lah ban mih bujli ha ka jaka jong u Bah Kyrmen Shylla uba bat mynta kum u Myntri ka tnat Revenue & Disaster Management.
Ka khubor ka pyntip ba u MLA bala rangbah jong ka NPP na Resubelpara u Timothy D Shira u lah ban shah pynrung noh ha ka kynhun Myntri. Ïa u Timothy la bthah dang shen ba un hiar noh na ka shuki Deputy Speaker jong ka ïingdorbar thawaiñ.
Kiwei pat ki MLA kiba lah ban shah pynrung ha ka Kynhun Myntri ki kynthup ïa u MLA ka NPP na Jowai Bah Wailadmiki Shylla, MLA ka BJP na South Shillong Bah Sanbor Shullai, MLA ka HSPDP na Mawshynrut Bah Methodius Dkhar, u MLA ka NPP Marthon J Sangma bad wat ka kyrteng jong u Brening Sangma ruh ka la paw.
