Kohima, Nailur:
Ka Foothills Naga Co-ordination Committee (FNCC) ka la ai ïa ka jingthoh kaba tyngeh bha sha u Myntri ka tnat ki kam poh ïing jong ka sorkar pdeng u Amit Shah, da kaba pyrshah ïa ka jingthmu ban thaw ïa ki ktem ba la buh kyrpang na ka bynta ki seng lehnoh Kuki ha Kangpokpi distrik jong ka jylla Manipur.
Ka jingmihkhmat, kaba la pynpoi lyngba u Lat ka Manipur, u Ajay Kumar Bhalla, ka la kyntu ïa ka sorkar pdeng, ba kan weng noh mardor ïa katei ka jingthmu, da kaba maham ïa “ki jingma kiba shyrkhei bad ki bym lah ban kiar” lada katei ka jingtyrwa, kan ïaid shakhmat.
Katkum ka jingong jong ka FNCC, ka jingthmu ban thaw ïa ka Sinai Camp ha Sijang kaba hap hapoh thanad Saikul bad ka Thingsat Camp ha Kharam Vaiphei kaba hap hapoh thanad Kangchup ki hap beit ha ki jaka jong ki kpa tymmen jong ki Naga.
Ka met ka la ong ba kano kano ka jingpyrshang ban pynkylla ïa ka jinglong jong kine ki jaka kan long ka “jingpynkheiñ kaba jur” ïa ka hok tynrai bad ki jingïada jong ka riti synshar jong ki jaitbynriew Naga.
Ka jingthoh jingkynmaw ka la pynpaw ïa ka jingbitar ba la dep ban pynlong ïa ka jingjurip ïa ka khyndew ha katei ka jaka “khlem ka jingtip, jingmynjur, ne jingïamir jingmut na ki trai jaka kiba dei hok.”
Da kaba khot ïa kane ka jingleh kum ka jingleh kaba shiliang, kaba pyrshah ïa ka riti synshar ka ri, bad kaba “pynjah burom jur,” ka FNCC ka la kynnoh ba kane ka jingleh ka pynkheiñ ïa ki jingkular ba la ai kham mynshwa da ka tnad kam pohïing jong ka Manipur ba yn burom ïa ki jingsngew jong ki Naga haba bishar bniah ïa ka jingïasoi soskular halor ka Suspension of Operations (SoO).
Ka FNCC ka la pynkynmaw ba ka la weng noh ïa ki jingïakhih kiba kham mynshwa da ka jingsngewbha hadien ba la ïoh ïa ka jingpynthikna na ki heh sorkar Manipur, ba kynthup ïa u Commissioner-cum-Secretary (Home) u Ashok Kumar.
Ka la kynnoh ba ka sorkar ka la phaidien noh na ki jingkular jong ka da kaba pynkhih mynta ïa ka jingthmu ban ai “ka jaka rieh tngen ïa ki kynhun lehnoh Kuki ha ka jaka jong ngi.”
Da kaba pynbna ba ki jaidbynriew Naga kin ym shah ban buh ïa kino kino ki ktem kiba kum kine, ka FNCC ka la maham ba kin pyrshah “lyngba ki lad ki lynti baroh kiba lah ban ïoh” bad wat ban pynkhih ïa ki nongtrei mon sngewbha ban ïakhun pyrshah met ïa ki jingpyrshang ban rung tuh.
“Ngi pynkynmaw biang, da ka jingsngewkhia kaba khraw, ba ki jaitbynriew Naga ki long kiba la pynkhreh pura ban ïada ïa ka jaka jong ki kpa tymmen jong ngi da ka jingkut jingmut, ka jingïatylli, bad ka jingkut jingmut kaba khlem artatien,” la ong ka jingthoh jingkynmaw, da kaba shim ïa ka sorkar ha ka jingkitkhlieh na ka bynta kano kano ka jingshah pynhap.
Ka FNCC ka la kyntu ïa u Myntri ka tnat ki kam poh ïing jong ka sorkar pdeng ban tuklar mardor bad ban weng noh ïa baroh ki jingtyrwa kiba ïadei bad ki ktem Kuki kiba la kdew.
Ka la khot ïa ka sorkar pdeng ban pynneh ïa ka hok jong ka Riti synshar bad ka Riti dustur jong ki trai jaka trai ri trai muluk Naga bad ban khanglad ïa ka jingjur jong ka jingïaleh ha Manipur.
