Shillong, Nailur 14
Ka jingïakhun jong ka lympung ïalehkai Shillong Premier League hapdeng ka Shillong Lajong FC bad ka Langsning FC, ka la kut noh ha ka jingïakhaid da mar 2-2 kol ha ka sngi Saitjaiñ ha SSA Stadium kaba ha First Ground, Polo.
Ka jingïakhun ka long ba dei ka Langsning FC kaba la lah ban tam shakhmat da ki ar kol, hynrei ka Shillong Lajong FC ka la ïeng ïakhun na ka bynta ban pynphai kylla bad ban ïasam mar shi point.
Kumta ha kaba kut jong kane ka jingïakhun, lada yn ïa phai sha ka miej ïakheñ point, kam shim don kano kano ka jingktah, namar ka Shillong Lajong ka ïai neh ha ka kyrdan kaba lai hadien ba ka la ïoh ban khur 9 poiñ, katba ka Langsning pat ka la ïai neh ha ka kyrdan kaba saw hadien ba ka la khur 8 poiñ.
Haba phai sha ka jingïakhun, marsien ïa sdang ka kynhun ïalehkai ka Langsning FC ka la pyrshang ban ïakhun tyngeh bad ka la ïoh ban pynkhih jar lyngba u Dajiedlang Wanshong ha ka minit kaba 5.
Haba wan ban bteng ia ka kylla miet, ka Langsning ka bteng ban pyllait lut ïa ka rukom ïalehkai ha kaba ka la pynbud biang ïa ka kol kaba ar lyngba ka corner ba la shut da u Nikelson Bina ha ka minit kaba 57.
Watla ka Lajong ka la shah thep haduh ar kol, hynrei ki rangïalehkai ki la ïai neh ha ka rukom ïalehkai bad dei ha ka minit kab 62 ba ka la pynphai kylla lyngba u Riborlang L. Lyngkhoi bad kane ka long kum ka jingai mynsiem ïa kane ka kynhun ban bteng ha ka ban ïalehkai bha shuh shuh.
Hashwa ba u rephri un pynwai noh ïa ka jingïalehkai ka Lajong ka la ïoh ban thep biang sa shi kol lyngba u Mebannangkiew Thabah (90+5) na ka bynta ban ïakhaid mar ar kol.
Ka jingïakhun ha ka lah sngi U Blei kan long hapdeng ka Mawlai SC pyrshah ïa ka Mylliem SC, ha ka por 4:30 nohphai sngi.
