Imphal, Nailur:
Ki shipai pahara, ki la ïai bteng ban pynlong ïa ka jingleit khynra sha kylleng ki jaka khamtam ha ki jaka khlaw bad ki jaka them kiba don ha kylleng ki distrik jong ka Manipur.
Ka jingleit khynra ka la long sha ki jaka ba la ju ïoh kurup khah khah ïa ki tiar siat bad ba jia ki kam pyntriem kumba la sakhi ha ki por ba la leit.
Kumba la buh, la ong, ba ka thong ban ïakhun pyrshah ïa ki kam beaiñ bad ki kam pyntriem ha kane ka jylla ka long shwa da ka jingleit khynra tiar siat, naba ha ki por ba la leit ki la don ki jingleit lute ïa ki tiar siat na ki jaka treikam jong ki pulit bad nangne ki la jur ki kam pyntriem ha ka jylla.
Na ka jingpynlong ïa ka jingleit khynra kaba la ïai bteng na ka por sha ka por ha ki distrik kiba don ha ki jaka lum bad ki jaka them jong ka Manipur, ki bor pahara ki la lap ïa ka jaka buh tiar siat bad pynbthei kiba bun.
Kine ki jingtreikam ha ka ban leit khynra, ka long halor ka jingthmu ban pynkhlaiñ ïa ka jingsynshar ha ki jaka ba rit paid, kaba la long ha ki jaka ba marjan jong ka khlaw Dampi, kaba don ha ka distrik Churachandpur. Napdeng ki tiar ba la ïoh ban kurup ki long kawei ka suloi .303, kawei ka suloi .22, ar tylli ki pistol shna hi, ar tylli ki Pumpis, shiphew song ki kuli bym pyndonkam jong ka suloi.303, ar tylli ki song kuli jong ka suloi 9 mm, san song ki kuli jong ka 7.62 mm, san tylli ki Bore Cart Case, san song ki kuli Pumpi, ar tylli ki bom pynsat khmat, uwei u bom pyntdem, uwei u Mortar bom ba 2 inshi, shiphew tylli ki tiar pynbthei Grade 2, bad arphew tylli ki tiar pynbthei.
Ki shipai ki la pynjur ïa ka jingpahara jong ki ha kine ki jaka ba kongsan ban ïada na ka jingpyndonkam bakla ïa kum kine ki tiar kiba shyrkhei.
Ki jingpahara kiba dang ïaid shakhmat ki pynthikna ruh ïa ka jingïaid lynti kaba suk bad khlem jingkhanglad na ka bynta ban pynpoi ïa ki mar ba kongsan ha kylleng ka jylla.
Ki bor pahara ki la pynsuk ïa ka jingïaid beit ïaid ryntih jong ki 16 tylli ki kali kiba kit ïa ki tiar ba kongsan ha shilynter ka surok bah National Highway 2 (NH-2), kaba dang long kawei na ki lynti ba kongsan ha ka jylla.
Ban ïada ïa kine ki kali, la buh ïa ki lad pahara kiba pyrkhing bha, ha kaba ki bor pahara ki don ha ki jaka kiba lah ban shah ktah, khamtam ha ki jaka ba rit paid jong ka surok bah.Nalor ki jaka pahara ha ki surok bah, la buh haduh 106 tylli ki Nakas (ki jaka pahara) ha kylleng ki distrik bapher bapher, ha ki jaka lum bad ki jaka them.
