Shillong, Nailur 14
Ka ‘thei ïakura jong ka ri, ka Minakshi Hooda ha ka sngi U Blei ka la khur ïa ka takma ksiar ha ka World Boxing Championships 2025, hadien ba ka la pynliem noh ïa ka Nazym Kyzaibay na Kazakhstan ha ka 48kg jong ki kynthei.
Ka Nazym Kyzaibay, ka dei ka nongïakura kaba la khur jingjop bunsien ha ka pyrthei bad kaba la khur ruh ïa ka takma rnong ha ka Paris Olympics, hynrei ka Hooda kaba dang 22 snem ka rta ka la lah ban long ka nongjop hadien ba ka la jop da 4-1 ha Echo Arena kaba ha Liverpool.
Naduh kaba sdang, ka Minakshi ka la paw ba ka sngewskhem, ha kaba ka la ïakhun tyngeh. Ka la lah ban tam haka wat kaba nyngkong bad haduh kaba kut ka la lah ban tam haduh 4-1. Hynrei katei ka nongïakura kaba na Kazakhstan ka la wanphai da ka jingjop ha ka wat kaba ar ha kaba ka la tam da 3-2 bad haduh kaba kut ka la mad ïa ka jingshah rem.
Kane ka lympung ka la poi sha kaba kut ha ka 14 tarik mynta u bnai, ha kaba ka India ka la khur ar ki takma ksiar, lem bad mar kawei ka takma rupa bad rnong.
Nalor ka Hooda, ka India ka la khur kham hashwa ïa ki takma ksiar ha ka sngi Saitjaiñ lyngba ka Jaismine Lamboria (57kg). Ïa ki takma rupa khur da ka Nupur Sheoran (80+kg) bad takma rnong da ka Pooja Rani (80kg).
