Shillong, Nailur 14
Ki nongïalehkai karate jong ka Shillong College ki la lah ban sar lut ïa ki jingjop ha ka lympung ïalehkai 12th Inter-School Karate Tournament 2025 ba la pynïaid da ka All Meghalaya Karate-Do Association (AMKa) hadien ba ki lah ban khur ïa ki jingjop ha baroh saw tylli ki kyrdan ïalehkai ha ka sngi Saijaiñ.
Ïa kane ka lympung la ïasnoh kti lang ryngkat bad ka Sports Development Cell jong ka Shillong College bad la kyrshan lang da ka tnat ïalehkai ka Sorkar Jylla.
Kane ka lympung ka long shi bynta jong ka jingjied ïa ki nongïalehkai kiba kynsai ne ka ‘talent scouting programme’ jong ka AMKA n aka bynta ka 39th National Games 2027, ha kaba ka jylla Meghalaya kan pynlong ïa kane ka lympung
Ka Shillong College ka ju long borabor kaba trei shitom bha ha ka jingïalehkai namar ka jingkyrshan kaba khraw ïa ki nongïalehkai jong ka. Ha katei ka jingïalang pynhap pyrda, u principal ka kolej u Dr. S. Khongwir u la long kum u kongsan, ha kaba u General Secretary ka Meghalaya State Olympic Association u Bah Finely Lad Pariat kum u la symbud kongsan.
Ki nongjop ha baroh saw tylli ki kyrdan ïalehkai na ka Shillong College ki long u Gideon Tympuin (men’s open kata), u Cheltis Shylla (men’s open kumite) bad ka Rebeka Nongspung (women’s open kata and women’s open kumite).
Ka St Anthony’s College ka la khur kawei ka takma rupa bad saw tylli ki takma rnong ha ka liang ki shynrang, katba ka St Mary’s College bad ka Lady Keane College ki la khur kawei ka takma rupa bad kawei ka rnong ha ka women’s kata. Kiba ju long ki ar ngut kiba shah rem ha ka semi final ki la wan ha ka kyrdan balai.
