Jowai, Nailur 14
Ka SCSC Nonglatem bad ka Da-i-hi Mynsngat ki la jam sha ka quarter final ha ka lympung ïalehkai 3rd Division Football Division na ka bynta ka 5th Adelbert Laloo Memorial Trophy ba la pynïaid da ka West Jaiñtia Hills District Sports Association (WJDSA), hadien ba ki la khur jingjop ha ka sngi Saitjaiñ.
Ha ka jingïalehkai kaba nyngkong, ka SCSC Nonglatem ka la pynliem noh ïa ka Mookaswan Dongnein lyngba ka tie-breaker da 4-2 kol hadien ba ki la ïakhaid mar 3-3 kol haduh kaba kut ka jingïakhun.
Ia ki kol ba la bynta ka Mookaswan Dongnein la thep da u Pyrkhat Shylla ha ka minit kaba 4, kumjuh u Lastborn Phawa (28) bad u Shain Shylla (77), katba na ka SCSC Nonglatem la thep da u Iforme Muktieh (31), Tomy Lamare (64) bad u Dotol Langshiang (74).
Ha ka jingïalehkai kaba bud, ka Da-i-hi Mynsngat ka la jop da 2-1 kol ïa ka Mookyrdup. Watla ka Mookyrdup ka la ïoh ban thep kol nyngkong tang mar ïasdang ka jingïalehkai lyngba u Shining Rymbai ha ka minit kaba 6, hynrei hadien shiteng kynta ka Da-i-hi Mynsngat ka la pynphai kylla lymgba u u Banker Muksor (34) bad ïa kawei pat la thep da u Hopestarwell Thubru (40).
Haba phai sha ka jingïalehkai jong ka 2nd Division Football Tournament (8th Debo Shullai Memorial Trophy) hapdeng ka Moosalyngkat bad Shang-pung Khliehmuchut ki la ïakhaid mar 2-2 kol. Ïa ki kol na ka Shangpung Khliehmuchut la thep da u Shikil Langbang (1) bad u Heibormi Sungoh (72), katba na ka Moosalygkat la thep da u Teimiki Sungoh (18) bad u Kitbokmi Suchiang (53).
Ha ka lah sngi U Blei ka jingïalehkai pre-quarter final jong ka 3rd Division kan long hapdeng ka Lumchyrmang Mihmyntdu SC pyrshah ïa ka Lumkhangdong Kyndong Tuber SC ha ka por 10 baje mynstep, katba ka Youth Walfare Ïooski SC ïa ka Umchangiar SC ha ka por 12 baje mynsngi.
