Shillong, Nailur 14
Ki jingïalehkai ‘group’ jong ka Second Division Football League 2025 ba la pynïaid da ka Shillong Sports Association ka la poi sha kaba kut ha kaba ka Marbisu bad ka Mawryngkneng ki la long sa kiwei pat kiba la lah ban pynthikna na ka bynta ban jam sha ka quarter final.
Ha ka jingïalehkai kaba khatduh jong ka Group-C kaba la long ha ka sngi Saitjaiñ, ka Mawryngkneng ka la pynliem noh ïa ka Umphrup da 3-1 kol na ka bynta ban lamkhmat ha kane ka group.
Ïa ki kol jong ka Mawryngkneng la thep da u Ïohbor Mukhim (2), Rishot Sari (5) bad u Andy Kharsati (47), katba na ka Umphrup la thep da u Nangskhemlang Wahlang (22).
Ha kawei pat ka jingïakhun jong ka Group-B, ka Marbisu ka la pynliem noh ïa ka Umphyrnai da 3-0 kol. U Fildy Star Nongbet u la khur ïa ka hat-trick hadien ba u la thep ha ka minit kaba 27, 34 & 51. Kane ka jingjop kam shym la don jingkylla ha kaba ka Marbisu ka la pynkut ban don hadien ïa ka Smit lyngba ka jingïapher ha ka jingthep kol watla ki la khur mar 6 point. Te kumta ka Laitkyrhong ka la bat ïa ka kyrdan ba hakhlieh da kaba kamai 8 point.
Hynrei na ka liang ka Marbisu kan long kawei na ki ar tylli ki kynhun kiba wan ha ka kyrdan kaba lai (kawei pat ka dei ka Tynring) ban rung sha ka quarter-final, ka ban sdang naduh 16 tarik mynta u bnai.
Ki kynhun kiba don kham shatrai ha kine ki lai tylli ki group kin hap ban ïaknieh lait hiar ha ka ‘mini league’ bad ki ar tylli kiba ïalehkai sniew kin shah pynhiar kyrdan sha ka Third Division ha u 2026. Kine ki kynhun ki long ka Umpling, Umphyrnai bad ka Umphrup. Kine ki jingïakhun kin sdang ha ka 16 tarik mynta u bnai.
