Shillong, Nailur 14
Ka Sorkar Jylla ka la tyrwa ïa ka ‘Supplementary Demand’ kaba T.333 klur ban bei tyngka ïa ki projek pynroi sor bapher-bapher, kynthup ka jingtei ïa ka Secretariat ka bathymmai, ka Additional Secretariat Complex, bad ki ‘Hostel’ na bynta ki kynthei kiba trei ba ktah.
Na kane, la pan T.200 klur lyngba ka ‘Supplementary Demand’ na bynta une u snem mang tyngka ba mynta ha kaba ïadei bad ka Secretariat bathymmai ha New Shillong Township, kaba ka jingpynlut ïa ka projek kan long T.1231.03 klur. Kane ka Secretariat bathymmai kan kynthup ïa ki ophis Sorkar, kan pynbha ïa ka jingïatreilang bad ka jingtreikam, ong u Symbud Myntri ka Jylla ka tnad ki kam pynroi sor, u Bah Sniawbhalang Dhar ha ka jubab halor ka ‘Cut Motion’ ba la wanrah da u Nongïalam ka Liang Pyrshah, Dr. Mukul Sangma bad u nongmihkhmat ka TMC na Ampati ha Ïingdorbar ha ka Sngi Thohdieng.
U la pyntip ruh ba T.45 klur la pan lyngba ka ‘Supplementary Demand’ na ka bynta ban tei ïa ka Additional Secretariat Complex ha Tura, ha kaba ka jinglut jingsep jong ka projek ka long T.165.80 klur.
Ka Complex kan kynthup ïa ki jaka na bynta ki nongmihkhmat, ki heh ophisar, bad ki nongtrei ophis, ka ban pynbha ïa ka jingsynshar bad ka jingpynïaid kam.
Shuh shuh u Symbud Myntri Rangbah u la pyntip ruh ba ka Sorkar ka la tyrwa ban tei ïa ki ‘Hostel’ kiba ‘400-Seater’ ha Shillong bad kiba ‘200-Seater’ ha Jowai bad Tura (ha ka dor kaba T. 144.80 klur) ban kyntiew ïa ka jingshim bynta jong ki kynthei ha ka kam ka jam bad ban pynbiang ïa ki jaka sah kiba shngaiñ bad na ka bynta kane, la pan T.88 klur lyngba ka ‘Supplementary Demand’ na bynta u snem mang tyngka ba mynta.
