Shillong, Nailur 14
U Bah DD Lapang u long u briew u ba ym ju buh-nud ïano-ïano ruh hynrei u dei u briew u ba don ka jingieit, u ba don ka mynsiem kaba heh kaba ïar bad kaba iohi jngai ha ka ban pyrkhat ha ka jingiadei ban pynïaid ïa ka kam paidbah ha kane ka Jylla.
Ïa kine ki kyntien la pynpaw da u Bah Martle N Mukhim, nongmihkhmat barim ka Mawkynrew Constituency, ha ka por ba u leit sngewlem ha ïingsah u Bah Lapang ha Lachumiere, Shillong.
U Bah Martle u la ong ba u sngewtynnad ïa ka jinglong u Bah Lapang, u dei u briew bym hun ban shong khlem da ïoh ban long Myntri namar u dei u briew u ba kwah beit ban trei ïa ka kam la ka dei ha kano kano ka dur.
U Bah Martle u la pynpaw ba u la kwah ban wan ïakynduh ïa u Bah Lapang la bunsien ha kine ki sngi, hynrei namar ka jingbym shait ka met, u khlem ïohlad shuh ban ïakynduh khatduh ïa Bah Lapang bad u la ai ka jingkitbok kit wriang ban leit suk leit saiñ sha kata ka jaka ba la pynkhreh.
“U long uwei u nongïalam, u ba eh kum ka snieh khla, ka jinglah shah jong u ïa ka jingbeiñ jingkynnoh jong ka pyrthei, uba ïengskhem ha la ka jong ka nongrim ban trei ban ai jingshakri ïa u paidbah ba bun balang, ngi ïa pyrshah bha ha ki khep ki khep, hynrei ngi la iatrei tyngeh ruh ha bun ki khep ban ïatreilang,” u la ong.
U Bah Martle u la ong ba u Bah Lapang u la noh synñiang shibun ki kam ban ai jingshakri ïa ka Jylla khamtam ïa ka Ri-Bhoi ban pynïoh District bad ha kiba bun kiwei pat ki jingpynïaid kam ka imlang ka sahlang.
