Shillong, Nailur 14
U MP na Shillong u Dr. Ricky AJ Syngkon u la pynpaw ïa ka jingsngew-sih hadien ba ka Jylla Meghalaya ka la duh noh ïa u nongïalam, kata u Dr.DD.Lapang.
Haba kren sha ki lad pathai khubor u Dr. Ricky AJ Syngkon u la ong, “Ka jingkhlad jong u Dr.DD.Lapang hooid ka long ka jingduh kaba khraw na ka bynta ki khun, ka lok bad ki bahaïing ha sem, hynrei kane hi ka dei shibynta ka jingïaid lynti ka jong ngi ha kane ka pyrthei kaba ngi shong ngi sah mynta tang shipor.”
“U Dr. DD Lapang ha ka jingïadei ka jong nga ka dei beit ha ka liang jong ka pule puthi, ha kaba u Dr. DD Lapang u dei u President jong ka Governing Body ka Ri Bhoi College bad nga kum u nonghikai hapoh ka Skulbah, NEHU bad nga long ruh u dkhot jong ka Governing Body,” la ong u Dr. Ricky.
U la ïathuh, “Ngi ju pyni ïa ki ñia ki jutang ha kaba ïadei bad ka jingïaid beit ïaid ryntih jong kato college bad kaba nga ju kynmaw ïa u Dr. DD Lapang ka long ba u dei u briew uba kloi ban pdiang ïa ki jingpyni ïa kiei kiei. Hooid teng teng ka don ruh ka jingshisha ba lada u Dr. DD Lapang u don kawei ka jingmut u kwah beit ban ïaid shakhmat bad dei hangta ba ngi ju ïapyninia,” la bynrap u Dr. Ricky.
Shuh shuh u la ong ba Dr. DD Lapang kum u briew uba don naduh ka jingsdang jong ka Jylla u la noh synñiang bha ha kaba ïadei bad ka politik, ka imlang ka sahlang bad ha kano kano ka bynta ba u don, la ka long ha ka por ba u dang long kum u Myntri Rangbah ka Jylla nalor kiwei kiwei de ki bynta.
“Kawei kaba shon eh ïanga ban pyrkhat ïa ka jingïaid lynti u Dr. DD Lapang ka long ba u sdang ïa ka jingïaid lynti kum u nonghikai bad ter ter haduh ban shim ïa ka bynta kum u nongïalam khamtam eh ïa ka them Ri Bhoi bad ruh ïa ka jylla hi baroh kawei,” u la ong.
U Dr. Ricky u la ong ruh ba u Dr. DD Lapang u dei shisha u briew uba lah ban pynïadei bad kiba bun ki briew naduh kiba rit haduh kiba la heh la san bad u dei ruh u briew uba long discipline ha ka jingim. Haduh ban da ïaid 96 tylli ki snem ha ka jingim jong u briew, ngeit ba ka long ka jingkyrkhu bad ka jingkyrkhu ka wan na ka jinglong ba adkar ha ka jingim jong u.
Kumta u la ong, “Ngin hap ban pyrthuh bud ïa ka jinglong jong u Dr. DD Lapang ïangi kiba dang im ha kine ki sngi ba mynta.”
Halor ka jinglong jong u Dr. DD Lapang kum u nongïalam ka jylla, u Dr. Ricky u ong, “Nga ngeit ba u la leh ïa shibun ki kam bad khamtam eh na ka bynta ka Ri Bhoi. Na ka liang ka VPP bad jong nga, ngi dwai ba U Blei un don ryngkat bad i kurim jong u, ki khun ki ksiew bad baroh kiba don ka jingïadei bad u Dr. DD Lapang bad ba U Blei un ai ka jingsuk ka jingtngen ïa ki.”
