Shillong, Nailur 14
U coach ka kynhun ialehkai ka ri India, u Khalid Jamil u la ïa ki 30 ngut ki rangïalehkai na ka bynta ka prokram kilanmet ka ban long ha Bengaluru, ha kaba u Sunil Chhetri un wanphai biang na kaba shongthait ban ïakhun pyrshah ïa ka Singapore ha u Risaw mynta u snem.
Kane ka jingkilanmet kan sdang ha ka 20 tarik mynta u bnai ha Bengaluru bad ki rangïalehkai kin hap wan ai jingtip shi sngi shwa ban sdang katei ka jingkilanmet.
U khur ïalehkai phutbol u Sunil Chhetri u la wanphai biang sha ka kynhun ïalehkai ka ri. U Chhetri u la shah kyntait ha u Jamil na ka bynta ka CAFA Nations Cup kaba la sdang naduh 29 tarik u Nailar da kaba ong ba ka long tang ka jingpynkhreh na ka bynta ki jingïalehkai ba kongsan jong ka Asian Cup qualifiers ban long ha u Risaw.
Kumba ka paw u Chhetri uba u la shongthait hadien ka jingïalehkai pyrshah ïa ka Kuwait ha u Jylliew jong u snem ba la lah, hynrei u la wanphai biang na ka bynta ka jingïalehkai pyrshah ïa ka Maldives ha u Lber mynta u snem, hadien ka jingkyrpad jong u coach barim u Manolo Marquez ban ïarap ïa ka kynhun ha ka Asian Cup (qualifiers third round). U Chhetri u la ïalehkai saw tylli ki jingïalehkai naduh katei ka por bad u la thep shisien kol – ha ka jingïalehkai ba la jop da 3-0 ïa ka Maldives.
Ki rangïalehkai na ka Mohun Bagan SG bad FC Goa, kiba la don lang hapoh katei ka thup, kin sa shah khot hadien hadien ba la kut ka AFC Champions League Two.
Nalor kine, san ngut ki rangïalehkai la pynap lypa, ar ngut na ka kynhun ïalehkai U-23, bad lai ngut ki nongïalehkai ba la kham rangbah. Ïa ka kyrteng jong ki yn sa pynbna hadien.
Kane ka jingkilanmet ka long ban ïarap ïa ka India ban pynkhreh na ka bynta ki ar tylli ki jingïalehkai jong ka AFC Asian Cup 2027 Qualifiers Final Round ha ka Group-C, ha kaba kin ïakhun ar tylli ki jingïalehkai pyrshah ïa ka Singapore – ha ka 9 tarik u Risaw ha National Stadium, Singapore, bad ha ka 14 tarik u Risaw ha Pandit Jawaharlal Nehru, Margao. Ïa ka kynhun kaba khatduh na ka bynta ki jingïakhun pyrshah ïa ka Singapore yn jied na kane hi ka thup.
Ki 30 ngut ki rangïalehkai na ka bynta ka prokram kilanmet
Goalkeeper: Amrinder Singh, Gurmeet Singh & Gurpreet Singh Sandhu.
Defender: Anwar Ali, Bikash Yumnam, Chinglensana Singh Konsham, Hmingthanmawia Ralte, Muhammed Uvais, Pramveer, Rahul Bheke, Ricky Meetei Haobam & Roshan Singh Naorem.
Midfielder: Ashique Kuruniyan, Danish Farooq Bhat, Jeakson Singh Thounaojam, Jithin MS, Macarton Louis Nickson, Mahesh Singh Naorem, Mohammed Aimen, Nikhil Prabhu, Suresh Singh Wangjam & Vibin Mohanan.
Forward: Irfan Yadwad, Lallianzuala Chhangte, Manvir Singh (jr), Mohammed Sanan K, Muhammed Suhail, Parthib Gogoi, Sunil Chhetri & Vikram Partap Singh.
