Kathmandu:
Ka nongbishar barim jong ka Supreme Court jong ka Nepal, ka Sushila Karki, kan long ka myntri rangbah kynthei ba nyngkong jong katei ka ri, hadien ba ki jingiakhih pyrshah bamsap kiba la pyniap briew, ki la pynhap noh ia ka sorkar.
Ia kane ka longkmie kaba 73 snem ka rta la pynsmai ha ka jingialang kaba lyngkot, ha kaba ka la long ka kynthei kaba nyngkong eh ban ialam ia ka jaitbynriew Himalaya kaba duk hadien ba la iasoi ia ka jingiateh bad ki nongialam jingiakhih.
Palat 50 ngut ki briew ki la ïap ha ka jingïakynad bad ki pulit pynïakhih paidbah ha kane ka taiew ba la mih na ka jingkhang ïa ki social media platforms.
La weng noh ia katei ka jingkhang ha ka sngi Nyngkong – hynrei ha kata ka por ki jingiakhih ki la nang kiew sha ka jingiakhih paidbah. Ki paidbah kiba la bitar lep ki la thang ia ka parliament bad ki iing sorkar ha ka nongbah Kathmandu ha ka sngi thohdieng bad kaba la pynbor ia u myntri rangbahduh ka ri u KP Sharma Oli ban hiar shuki noh.
Kham mynshwa ha kane ka sngi palei, u nongai jingmut ha ka tnad pathai khubor jong u President Ram Chandra Poudel u la pynthikna sha ka BBC ba u Karki un shim ia ka jingsmai ha katei ka janmiet.
Ia kane ka jingiateh hapdeng u president bad ki nongialam jingiakhih la poi hadien ba la iamir jingmut da ki sngi. Ki riew shemphang ain ruh ki la iadon bynta lang.
La pynduh noh ia ka Parliament ha ka por janmiet jong ka sngi palei bad la pynbna ba ka elekshon paidbah kan long ha ka 5 tarik u Risaw jong u snem ban wan.
La khmih lynti ba ka Karki kan sa thung myntri ha ka kynhun myntri jongka tang hapoh khyndiat sngi.
La niew ia ka kum kaba don ia ka dur kaba khuid, bad ia ka jinglong nongialam jong ka ia ka sorkar shipor la kyrshan da ki nongialam samla pule na ka kynhun ba la khot ka “Gen Z”.
Ha ka sngi thohdieng, u Karki u la leit jngoh ia ka jaka iakhih ha Kathmandu ha kaba 19 ngut ki briew ki la iap ha ka jingiakynad bad ki pulit ha ka sngi shuwa. Ka la iakynduh ruh ia ki katto katne kiba mynsaw kiba dang shah sumar ha hospital.
Katei ka PM ba thymmai, ka dei kaba la kha ha ka longïing kaba don ka jingïadei kaba jan bha bad ka hima saiñ hima sima Koirala, na ka seng synshar paidbah kaba heh tam jong ka ri, kaba dei ka Nepali Congress, bad hadien u la ïa poi kha bad ka Durga Subedi, ka nongïalam ha katei ka por.
Ki jingïakhih ki la mih na ka rai jong ka sorkar ha ka taiew ba ladep ban khang ïa ki 26 tylli ki lad pathai khubor, kynthup ïa ka WhatsApp, Instagram bad Facebook – hynrei shen ki la nang kiew ban pynpaw ïa ka jingbym sngewhun kaba kham jylliew bha ïa ki riew pawkhmat jong ka saiñ hima sima jong ka Nepal.
Ha ki taiew shwa ka jingkhang, ka jingïakhih “nepo kid” – kaba pynpaw pyrthei ïa ka jingim ba riewspah jong ki khun jong ki politishian bad ki jingkynnoh bamsap – ka la kiew ha ki lad pathai khubor.
Bad katba ïa ka jingkhang ïaid lyngba ki social media la weng noh kyrkieh ha ka miet jong ka sngi Nyngkong, ki jingïakhih ki la ïoh ïa ka jingkhlain kaba ym lah ban khanglad haduh kata ka por.
