Shillong, Nailur 14
Ki skul kiba don ha ka thaiñ Jaiaw bad Mawkhar kin ïoh shuti ha ka sngi Nyngkong ka 15 tarik mynta u bnai, kaba dei ruh ka sngi leh burom khatduh bad leit ontep ïa ka met kaba sah jong u Dr DD Lapang.
Ka Deputy Commissioner jong ka East Khasi Hills District ka Kong RM Kurbah ka la pynbna ba baroh ki skul kiba don ha Jaiaw bad Mawkhar kin ïoh shuti lashai ka sngi ka 15 tarik Nailur 2025 khnang ban nym wanrah ka jingdheng kali haba ka Sorkar kan leh burom khatduh ïa u Dr.DD Lapang, Myntri Rangbah barim ka jylla ha Madan Student’s Jaiaw ha ka por 1:00 baje nohphai sngi.
Hadien ka jingleh burom da ka Sorkar Jylla, yn pyndep pat sa ïa ka jinglehniam ba khatduh ha lum jingtep Balang Presbyterian Jaiaw ha Weiking Jaiaw.
