Shillong, Nailur 15
Ka jingbujli ïa ki Myntri ka Sorkar Meghalaya Democratic Alliance (MDA-2) hapoh ka jingïalam jong u Conrad K Sangma, kan long lashai ka sngi ka 16 tarik, ha kaba kin don haduh phra ngut ki Myntri ki ban shah pynhiar shuki.
Katkum ka tyllong khubor la ong ba ka jingbam smai jong ki Myntri ba thymmai, kan long ha ka sngi Ba-ar ha ka por kumba 5 baje janmiet. La ong ba u Myntri Rangbah ka Jylla u Conrad u la ïoh ban ïakynduh ïa u Lat ka Jylla u C.H Vijayashankar ha ka janmiet jong ka sngi Nyngkong ban aiti ïa ka kyrteng jong ki Myntri ba thymmai ki ban mih bujli ha kane ka Sorkar synrop.
La ong ki Myntri kiba dei na ka National People’s Party (NPP) ki ban shah pynhiar shuki ki don saw ngut, kata ka Myntri ka tnat ka Koit ka Khiah ka Kong Ampareen Lyngdoh, u Myntri ka tnat Bording u A.T Mondal, u Myntri ka tnat Pule Puthi u Rakkam A Sangma bad u Myntri ka tnat Food and Civil Supplies u Ma Comingone Ymbon. Ki ban mih bujli pat ha ka jaka jong ki, ki long u MLA ka Jirang u Bah Sostheness Sohtun, u MLA ka Resubelpara u Timothy D Shira, u MLA ka Jowai u Bah Wailadmiki Shylla bad u MLA ka Dalu u Brening A Sangma. La ïoh ruh ka khubor ba wat ha ka United Democratic Party (UDP) ruh kan don ka jingbujli, ha kaba ki ar ngut ki Myntri kata u Bah Paul Lyngdoh bad u Bah Kyrmen Shylla kin hiar shuki noh bad ban bujli pat ïa ki, da u President ka UDP uba dei u MLA ka Mairang u Bah Metbah Lyngdoh lem bad u MLA ka Amlarem u Bah Lahkmen Rymbui. La ong ba ïa kane ka rai ban bujli la shim ha ka jingïalang kaba kyrpang jong ka UDP kaba la long ha ka step sngi Nyngkong.
Nalor kitei, kiwei pat ki Myntri ki ban hiar shuki ki long ka Bharatiya Janata Party (BJP) bad na ka Hill State People’s Democratic Party (HSPDP). U Bah A.L Hek, u Myntri ba bat ïa ka tnat Animal and Husbandry un hiar shuki ban ailad pat ïa u MLA ka South Shillong u Bah Sanbor Shullai, katba u MLA ka Mawshynrut u Bah Methodius Dkhar un mih bujli ha ka jaka jong u Bah Shakliar Warjri. Ka BJP bad HSPDP ki don mar ar ngut ki MLA ha ka Ïingdorbar kaba mynta.
Hapoh ka Ïingdorbar Thawaiñ kaba don 60 ngut ki dkhot, ka NPP marwei ka don ïa ka jingbun paid kaba long haduh 33 ngut bad ka don ruh ïa ka jingkyrshan na ki MLA jong ka UDP, HSPDP bad BJP.
