Raphael Warjri
Ha kaba kren ïa ka ktien Khasi la dei ban sngewthuh ba kumno kan wan ha ka thoh ha kata ka rukom ba yn lah ban sngewthuh shai bad kit jingmut katkum ka dawshai (context) ha kaba ïakren ne ha kaba thoh bad pule. Ka ktien ‘ei’ ne ‘ei ei’ ne ‘eiei’ kumjuh ruh kiwei kiwei ki ktien ba synrap shijur lada dei ban thoh la ka jong ne thoh synrop, haba ki dei tang shikyntien. Kiwei kiwei ki kyntien ruh kum- lei, lei lei, leilei, mar, mar mar, marmar, khala khala, khalakhala, khum, khum khum, khumkhum, bak, bak bak, bakbak, kloi, kloi kloi, kloikloi, thar, thar thar, tharthar, daiñ, daiñ daiñ, daiñdaiñ, shaid, shaid shaid, shaidshaid, kiwei, kiwei kiwei, kiweikiwei, hir, hir hir, hirhir, jai, jai jai, jaijai, dar, dar dar, dardar, nai, nai nai, nainai, tok, tok tok, toktok, laiñ, laiñ laiñ, laiñlaiñ, mian, mian mian, mianmian, tiak, tiak tiak, tiaktiak, ter, ter ter, terter, bad kumta ter ter ïa kiwei kiwei ki ktien kiba dang don byllai.
Ka ktien lei tang shikynnoh ka dei ka tienlyngkut ïa ka ktien ‘blei’ ba ym don jingïadei bad ka ktien lei, ne lei lei. Ha kajuh ka rukom kan long ïa kiwei kiwei ki ktien ba synrap shijur kajuh ka kyntien. Lada shim kum ïa ka ktien khum ka mut ba teh, katba khum khum pat ka mut ba mih stet da kaba bitar; nangta thar dei ba dung ki kynja ba nep, katba thar thar dei ba kloi ban ïaid ne trei ïa kano kano ka kam, kumta ba ym don kano kano ka jingïadei lada marwei ne synrap shijur. Lada sot da kiwei kiwei lait na kaba la jer haneng kum ka ktien shuh ka don artylli ki jingmut tang ha ka shikyntien, kawei ka mut ba phah kynriah, kawei pat ba dawa ai biang sa shisien, bad shuh shuh ka mut ba ban dawa biang kham bun. Kumjuh ruh ka ktien tar ka mut ban kad pynjot, kawei pat ba ïa biang tara, bad sa kawei pat ba kynthah kynsan, hynrei tar tar dei ïa kaba khluit palat liam. Kum kine kiei kiei dei ban pynlong ryntih khnang ban ym kulmar ka rukom thoh hapdeng kiba bun ki nongthoh, khamtam lada don ki ba pynksan ïa la ka daw lajong. Kumta donkam ka biangdor (standard) kaba ryntih salonsar ïa baroh ki nongthoh bad nongpule khnang ban lait na kano kano ka jinglong kaba mala ne lymbiang ha ka thoh ka tar, ka pule dangle bad ha ka kren ka khana.
Ka ktien ‘ei’ ka don artylli ki jingmut, kawei kum haba khot ïano ïano kiba dei ki riewphylla ba ym ithuh, ‘ei’ ka mut ruh ba ïoh ïa kaei kaei khlem bainong ne siew dor; hynrei ‘ei ei’ ka mut kaei re kaei. Ka ktien ‘mar’ ruh ka don artylli ki jingmut,kawei dei ïa ki kynja tiar pyndonkam ki bynriew, bad kawei pat ka mut ïa ki briew ba radbah; hynrei mar mar pat ka mut shen shen ne kloi lan ba ym dei ban sahteng ne leh syntan. Ka ktien ‘khala’ tang shikynnoh ym don jingmut ei ei, hynrei lada pynbud arsien kynnoh ïa kajuh ka kyntien khala-khala ka kit jingmut ïa kaei kaei kaba kynsan kynsan shi khyllipmat. Ka ktien ‘khum’ ka mut ba teh syrdoh daei daei, hynrei khum khum pat ka mut ba ïaid stet jyndat da kaba bitar ban beh ïano ïano; tang ba shikyntien ba teh syrdoh la kynnoh jlan ïa u dak ‘u’, bad ha kaba don shijur pat la kynnoh lyngkut ïa u dak ‘u’ kumta ka don ka jingïapher hapdeng kine ki arkyntien wat lada pule kumjuh ruh. Ka ktien bak pat ka thew ïano ïano kiba phet kynsan, hynrei bak bak pat ka thew ïa kaba phah ïano ïano ban leit kloi pynstet, kumta ka jingmut ka syriem kawei na kawei. Ka ktien thar ka mut ba dung u kynja ba nep shluit kum ki shiah, hynrei thar thar pat ka mut ba leh ïa kaei kaei da kaba stet palat. Ka ktien daiñ ka mut ba shaiñ ne ot da ka kynja wait, hynrei daiñ daiñ pat ka dei ba leh ne kren shaid shaid khlem ailad ban kyrda ne phai ktien. Kumta kine ki kyntien shijur ki don ki ba don jingmut tang shikyntien bad kiba kit jingmut da kumwei pat lada synrop arkyntien; hynrei ki don ruh kiba ym don jingmut tang shikyntien bad kit jingmut tang lada synrop lang arkyntien. Nalor kata ki don ruh kiba kajuh ka ktien ïapher ka rukom kynnoh, bad don ruh kiba ka juh ka rukom kynnoh ba kit jingmut pat la ka jong ha la ki kyntien, bad lada dei arkyntien kit jingmut sa da kumwei pat.
Kane ka rukom thoh thoh ktien Khasi kaba ïahap bad ka rukom kren ba paka ka dei ban don la ka jong ka aiñ thoh ktien kaba ym dei da u diengkot jong kiwei kiwei ki ktien mynder. Lah ban shim tang ïa ka thymmei jong ka rukom thoh ktien ka ba dei ban pynshong katkum ba dawa ka ktien, hynrei ïa ka rukom pynshoh ïa ka ktien tynrai katkum kaba kren ka dei ban don da ka aiñ shna kyntien kaba long thik na ka bynta ka ktien Khasi, kynthup ruh ïa ki ktien tnat na la ki shnong ha kylleng ki thaiñ. Nalor kata ka dei ruh ban don kano kano ka iktiar ka ban pynskhem ïa kata ka aiñ thoh ktien ha kata ka rukom ba salonsar ki nongthoh ki dei ban bud ryntih (uniform) bad biangdor (standard) ha baroh kawei ka jaitbynriew Khasi.Kata ka iktiar ka dei ban kynthup ïa ki riewtbit thoh ktien na ki shlem hikai bad kaba dei ban kubur da ka iktiar sorkar khnang ban kan ïaineh bad skhem syndon pateng-la-pateng haduh ka lawei ki pateng bynriew.
