Shillong, Nailur 15
U Myntri Rangbah ka Jylla, u Conrad K. Sangma u la bthah ïa ki pulit ka Jylla ban pynlong ïa ka jingtohkit kaba bniah halor ka jingïap ba sngewsih jong i heprit Insaphira Lyngdoh Mawnai (ba dang 4 snem ka rta), iba la jah rngai na ïingsah jong i kaba ha Nongrah-Nonglum ha ka step Sngi U Blei.
Ïa ka met jong i, la lap na kawei ka ïing kaba dang shna thymmai kaba don hajan ïing jong ine i heprit ha ka Lah Sngi U Blei, ha kaba ki jinglong-jingman ki pynsuba ba ka lah ban dei ka jingshah pynïap.
“Nga sngewsih jur ban tip shaphang ka jingïap jong i heprit Insaphira Lyngdoh Mawnai, iba dang 4 snem ka rta, iba la jah rngai na ka ïingsah jong i kaba ha Nongrah hynnin ka step. Ïa ka met jong i la lap mynta ka sngi ha kaba ki jinglong-jingman ki pynsuba ba ka lah ban dei ka jingshah pynïap,” ong u Sangma ha ka jingthoh ha ka rynsan lad pathai ‘X’ ha ka Lah Sngi U Blei.
U Myntri Rangbah u la ong ruh ba u la bthah ïa ki pulit ban tohkit bniah halor kane ka jingjia bad ban pyntikna ba kito kiba donkti kin ngat ha ka aiñ khlem ka jingpynslem.
“Nga pynpaw ïa ka jingsngewlem kaba khraw sha ki kmie ki kpa bad kiba ieid ba thoiñ jong i,” ong u Sangma.
Na ka liang jong ki pulit ki la pynlong ïa ka jingtohkit halor katei ka jingjia, ha kaba u Superintendent of Police, Bah Vivek Syiem u la pyntikna ba la phah ruh ïa ki stad ka tnad ‘Forensic’ ban ïarap lang ha ka jingtohkit.
Ki pulit ki la thaw ruh ïa ka Special Investigation Team (SIT) ban tohkit halor katei ka jingjia.
