Shillong, Nailur 15
Ki pulit ka Jylla, ki la thaw ïa ka Special Investigation Team (SIT) ban tohkit halor ka jingïap ba sngewsih jong iwei i heprit iba dang 4 snem ka rta, iba la jah rngai na la ïingsah kaba ha Nongrah-Nonglum.
Ïa ka met jong itei i heprit la lap ba la thiah pyllup ha kawei ka jaka ba lang um hapoh kawei ka ïing kaba dang shna thymmai hajan ka ïingsah jong i ha ka step Lah Sngi U Blei.
“Yn thaw ïa ka SIT haba ïadei bad kane ka mukotduma ban pyntikna ïa ka jingshisha bad ban thwet bad lap ruh ïa kiba donkti ha kane ka kam,” ong u Superintendent of Police ka East Khasi Hills, Bah Vivek Syiem haba kren sha ki nongthoh khubor.
Ïa kane ka SIT yn khlieh da u SP (City), Bah Herbert Kharkongor, hapoh ka jingkhmih bniah ba kyllum jong u SP ka East Khasi Hills.
I heprit Insaphira Lyngdoh Mawnai i la jah rngai na la ïingsah kaba ha Nongrah-Nonglum ha ka por kumba 8:45 baje jong ka step Sngi U Blei.
Ka kynhun kaba la pynlong ïa ka jingwad ïa itei i heprit, ba kynthup ïa ki bahaïing ha sem, ki dkhot ka VDP, ki nongshong shnong, bad ki pulit, ryngkat ki kynhun ‘Dog Squad’, ka la wad ha kylleng sawdong katei ka jaka hynrei kam shym la lap satia ïa i.
Ha kajuh ka por, la pyntip sha baroh ki thanad, bad la pynmih ruh ïa ka jingpynbna ban wad ne ka ‘Lookout Notice’.
Ïa ka met jong itei i heprit la lap na kawei ka ïing kaba dang shna thymmai kaba don hajan ha ka step jong ka Lah Sngi U Blei.
Na ka liang ki bahaïing jong i Insaphira, ki la ujor da ka ejahar ne First Information Report (FIR) ha ki pulit jong ka thanad Rynjah.
U Bah Syiem u la ïathuh ba ïa ka metïap jong i heprit Insaphira la lap da uwei na ki nongbylla uba trei ha katei jaka, kaba jngai kumba 100 mitar na ka ïingsah jong i.
“Hadien ba la lap ïa ka met, la khot ïa ka kynhun ‘Forensic’ bad la sei noh ïa ka met jong i na katei ka jaka bad la rah sha NEIGRIHMS. Ïa ka ‘Post Mortem’ la leh mynta ka sngi bad ngi dang ap ïa ka kaiphod (kumjuh ruh ïa ka ‘Forensic Analysis’ ban tip ïa ka daw jong ka jingïap),” u la ong haba pyntip ba la pynngat mukotduma pynïap briew haba ïadei bad kane ka jingjia.
U SP u la ong ruh ba ki pulit ki dang khmih bniah ïa ki nongsakhi, kynthup ïa u nongbylla uba la lap ïa ka met, bad kin nang pynïar ïa ka jingtohkit katba nang lum shuh ïa ki sakhi.
“Ngi dang tohkit ïa u nongbylla (uba la lap ïa ka met jong i). Ngin sa tohkit shuh-shuh ïa ki briew katba nang ïaid ka jingtohkit,” u la ong.
