Doha, Nailur:
U Myntri Rangbahduh jong ka Qatar, ha kine ki khyndiat sngi jong ka taïew ba la leit, u la maham tyngeh ba ka jinghiar thma jong ka Israel ha Doha ka bym pat ju jia mynno- mynno ruh, kaba thmu ïa ka Hamas, ka la pynïap ïa ka jingkyrmen jong ki nongshah rahbor ha Gaza, ha kaba u la dawa ba ïa u nongïalam jong ka Israel, u Benja-min Netanyahu, dei ban pynngat ha ki kyndon aiñ namar ka jingleit hiar thma jong ka Israel ïa u nongïalam ka Hamas uba leit phet rieh sha katei ka ri. Ki jingkren jong u ki long tang hadien shisngi ba ka Israel ka thmu leit thombor ïa ki nongïalam jong ka Hamas ha Qatar, kaba long ka ri kaba ju ïajan paralok eh bad ka US.
“Nga tharai ba kaei kaba u Netanyahu u la leh hynnin ka sngi, u la shu pynduh noh ïa ka jingkyrmen jong kito ki nongshah rahbor kiba don ha kti jong ka Hamas”, la ong u Sheikh Mohammed bin Abdulrahman Al Thani, u Myntri Rangbah -duh jong ka Qatar ha ka jingïakren bad ki nongthoh khubor.
Ka Doha ka dang “bishar bniah biang ïa kiei kiei baroh” ha kylleng ka jingïadon bynta jong ki ha ki jingïakren ban sangeh ïasiat ha ka lawei bad ban ïakren ïa ki sienjam kiba hadien bad ka Washing-ton, u la bynrap ha ki jingkynthoh ba la kdew ha ka live blog jong ka CNN hadien ka jingïakren bad ka nongpynbna khubor.
Kane ka jingleit hiar thma jong ka Israel sha katei ka ri, ka long tang 3 bnai hadien ba ka Iran ka la hiar thma pyrshah ïa ka jaka buh liengsuiñ jong ka US ha Qatar bad kane ka la wanrah ruh ïa ka jingartatien kaba jur halor ka jingïakren ban sangeh ïasiat ha Gaza ba la pynïaid da ka Qatar bad ka la pynthut ïa ki jingpynthikna ïa ka jingïada sha ka Gulf na ka ri US ba kongsan. Ha katei hi ka sngi, u Myntri kam pohïing ka Israel- u Israel Katz, u la byrngem ba ka Israel kan “leh pyrshah ïa ki nongshun jongka la ki don ha kano- kano ka jaka bad ha kajuh ruh ka por u Netanyahu u la kyntu ïa ka Qatar ban beh noh ïa ki heh jong ka Hamas lane ka Qatar kan hap shim jingkitkhlieh lada jia kaei- kaei hadien- habud.
Namar la ong ba dei ka Qatar kaba pynbit- pynbiang ïa ki kam saiñ hima- sima jong ka Hamas naduh u snem 2012 da ka jingkyrkhu bad ka jingkyrshan jong ka United States bad ka la long ka nong pynïasuk ba kongsan ha ka jingïakren sangeh thma ha Gaza ryngkat ka jingïatreilang jong ka Egypt bad ka America.
Ki shipai jong ka Israel, ki ïathuh ba ki la leit ban khynra ïa ki ktem jong ki lehnoh Houthi, hapoh Yemen, ha ka Sngi Ba-ar, kynthup ha ka nongbah Sanaa, ha kaba ki la ïap 35 ngut ki briew, katkum ka jing ïathuh jong ki lehnoh.
Ka kynhun lehnoh jong ka Palestine, ka Hamas, ka la ïathuh ba 6 ngut ki briew ki la ïap ha ki jinghiar thma jong ka sngi Balang ha Qatar, hynrei ki nongïalam ba rangbah jong ka, ki la lait im, da kaba pynskhem ïa “ka jingbym lah jong u nongshun ban pynïap ïa ki para jong ngi ha ka kynhun ïakren”.
U Trump u la ong ba ym shym la pyntip lypa ïa u bad ynda u la ïohsngew, u la kyrpad ïa u nongmihkhmat jong u, u Steve Witkoff, ba un maham mardor ïa ka Qatar hynrei ka jinghiar thma, ka la dep sdang.
U nongmihkhmat jong ka Israel sha ka United Nations, u Danny Danon, u la wad ban pynshisha ïa katei ka rai, da kaba pynshai lyngba ka radio jong ka Israel: “Kam dei ka jinghiar thma ïa ka Qatar; ka dei ka jinghiar thma ïa ka Hamas.”
