Shillong, Nailur 15
Ka kynhun jong ki briew kaba don kumba phra ngut eiei, hadien ba ki la shoh bad tied, ki la thmu ruh ban pynïap syndon ïa u trai dukan da ka waitlam.
Katkum ka khubor kaba la ïoh na ki pulit la ong ba u Manen Ch Marak u la ai ka jingujor ba ha ka 11 tarik mynta u bnai ha ka por kumba 1 baje mynstep, haduh phra ngut ki briew ki la rung jubor hapoh ka dukan jong u Galaseng M Sangma kaba don ha ka thaiñ Adinggre ha West Garo Hills da kaba leh mynleh ban thied sikret bad biri.
La ong ba hadien ba ki la leh mynleh ban thied ïa kitei ki mar, ki la sdang ban shoh bad tied ïa u Galaseng M Sangma, bad hadien kata, ki la knieh jubor ïa ka mobile phone ka jong u bad ruh ïa ka pisa kaba T.68,000/-, bad ruh ban pyrshang ban pynïap ïa u da ka waitlam.
Ha kaba ïadei bad kane ka jingjia, na ka liang jong ki pulit ki dang pynlong ïa ka jingtohkit ban lap ïa ki jingshisha.
Ha kawei pat ka jingjia, u Thingjang A Sangma u la ai ka jingujor ba ha ka 11 tarik mynta u bnai, ha ka por 4 baje mynstep, saw ngut ki briew ki la prong tuh hapoh ka dukan kaba dei jong u Molden Ch Marak kaba don ha Dechingre, Saldopara Tri-Junction ha West Garo Hills, bad ha kaba ki la thombor ïa u da ka wait, ki la shoh ïa ka kurim jong u bad ruh ban byrngem ïa ka bad ïa u khun jong ki, uba dang don tang 3 snem bad hadien kata ki la shim ruh ïa ka mobile jong ka.
