Khliehriat, Nailur 15
Ka Musniang SC bad Jalyiah United SC ki la khur jingjop ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA) ha ka lah sngi U Blei ha madan artificial turf Diengshynrum, Khliehriat.
Ha ka jingïakhun kaba nyngkong, ka Musniang SC ka la pynliem noh ïa ka Bataw YWSC da 1-0 kol bad kane ka la wan lyngba u Mardiphone Rymbai, uba la thep ha ka minit kaba 24.
Ha ka jingïalehkai kaba bud, ka Jalyiah United SC ka la jop da 2-1 kol ïa ka Pamrakmai SCSC. Ïa ki kol jong ka Jalyiah United la thep da u Walking Phawa ha ka minit kaba 42 bad u Justme Dkhar (58), hynrei ka Pamrakmai ka la pynphai kylla shi kol lyngba u Yesborn Ksih (54).
