Shillong, Nailur 15
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka bad kiwei ki kam tuh na kylleng ki jaka.
Katkum ka khubor ba la ïoh na ki pulit la ong ba ka Sushmita Chakma ka la ai ka jingujor ba hapdeng ka miet jong ka 11 & 12 tarik mynta u bnai, ki runar bym lah ban ithuh, ki la tuh ïa ka arshaka ka jong ka, kaba don ïa u registration number MZ01-AA-5286 na Madanrting Block-F, Shillong.
Katba na ka liang jong u Victor Choudhary u la ai ka jingujor ba ha ka 12 tarik mynta u bnai, ki runar bym lah ban ithuh, ki la prong tuh hapoh ka dukan jong u, kaba don ha LDB Building, Police Bazar, Shillong bad ban tuh ïa ki tiar bad ka pisa kaba long T.9,400/-.
U Rohit Kumar Joshi u la ai ka jingujor ba ha ka 12 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-T-5853 na ka thaiñ Oakland, Shillong.
Na ka liang jong ka Kong Eldi Mawiong ka la ai ka jingujor ba ha ka 12 tarik mynta u bnai, ha ka por kumba 1 baje dang step phyrngab, ki runar bym lah ban ithuh ki la tuh ïa ka arshaka ka jong ka bad ka pisa kaba long T.40,000 na ka ïingsah ka jong ka, kaba don ha shnong Umrit ha Ri-Bhoi.
Ka Dipika Dey ka la ai ka jingujor ba ha ka 11 tarik mynta u bnai, ki runar bym lah ban ithuh, ki la tuh ïa ar tylli ki shaka (tyre) na ka kali Bolero (AS01-0058) na ka thaiñ Bivar Road, Shillong.
Ka Kong Loretta Pyngrope ka la ai ka jingujor ba ha ka step jong ka 11 tarik mynta u bnai, bad kynnoh ba uwei u briew ba la tip kyrteng kum u Kitbok Rapmai, u la prong tuh hapoh ka dukan ka jong ka, kaba don ha Umpling Dongsharum, Shillong bad ban tuh ïa ki tiar kiba shongdor kumba T.20,000/-. Ha kawei pat ka khubor, u Assistant Rangbah Shnong jong ka Kynton-U-Mon, Nongkrem ha East Khasi Hills u la ai ka jingujor ba ha ka miet jong ka 10 tarik mynta u bnai, ki runar bym lah ban ithuh, ki la tuh ïa ki electric wire kiba la pyndait bad kawei ka water pump na ka Dong Lwai-U-Mon, Nongkrem.
U Bah Shanborlang Nongrum u la ai ka jingujor ba ha ka 9 tarik mynta u bnai, ki runar bym lah ban ithuh, ki la tuh ïa ka arshaka ka jong u (ML05-AB-3739) na ka thaiñ Mawkynrew, Block-II, Shillong.
Ka Kong Widora Tang ka la ai ka jingujor ba ha ka 29 tarik jong u bnai ba la lah, ha ka por kumba 1 baje dang step, la kynnoh ba u Marjan Suchiang, u la prong tuh ha ïingsah ka jong ka, kaba don ha shnong Musiaw ha West Jaiñtia Hills, ha kaba u la shoh ïa ka bad ban tuh ïa ka pisa kaba long T.40,000/-. U Bah Seiborlang Syngkli u la ujor ba ha ka miet jong ka 8 tarik mynta u bnai, ki runar bym lah ban ithuh, ki la tuh ïa ka arshaka (AS01-BP-2109) ka jong u na ka phyllaw jong ka ïingsah ka jong u, kaba don ha ka shnong Umsohbar ha Ri-Bhoi.
