Shillong, Nailur 15
U Kpa jong i heprit Insaphira Lyngdoh Mawnai, ba dang 4 snem ka rta, kata u Bah Gowell Lyngdoh Mawphlang u la ong ba ka jingïap ka khun jong u, kadei beit ka jingleh dusmon hano-re-hano namar ba ki ksiar ba i deng ha ki shkor ki khlem jah hynrei ki dang don.
U la ong ba lada dei ki nongtuh ki ksiar ki lah ban jah hynrei haba la lap ïa ka metïap jong i Insaphira, ki ksiar kiba don ha ki shkor ruh kim shym la jah. Kane ka pyni ba ka la dei ka jingshah pynïap dusmon.
Haba kren sha ki lad pathai khubor ha ka 15 Tarik u Nailur 2025, u Kpa jong I heprit u la ong ba kam idei ba la pynïap ïa ka khun jong u ha katei hi ka jaka ba la lap, hynrei kadei beit ba la shu wan bret dusmon.
U Kpa u la ïathuh ruh ba naduh hynnin ka sngi naduh ba i heprit Insaphira i la jah na la ïing, ki la dep wad ha kylleng-kylleng ki jaka bad ha katei ka jaka ba la lap ïa ka metïap ruh ki la dep wad hynrei kim shym la ïohi eiei pat.
“Ka jingïap jong i kam dei kaba ki pynïap ha kato hi ka jaka hynrei kadei kaba la shu wan bret dusmon, ha kaba ïa ka met ruh la tap da u maw bad i la thiah pyllup” la ong u Kpa.
Haba ïadei pat bad ka sngi ba jah ha ka step jong ka sngi u Blei, u Kpa u la ïathuh ba ïa i heprit Insaphira kim shym pat ïoh ai sha ai ja bad im pat ïoh bam eiei namar hashwa ban ai sha step i Insaphira i la jah noh na la ïing.
Kumta na ka liang jong u, u la kyntu jur ïa ki kmie ki kpa ba kin da husiar bha ban peit ïa ki khun khnang ba kan nym jia shuh kum kane ka jingjia, da kaba pynpaw ruh ba donkam ban buh da ki kor CCTV ban lap ïa ki nongleh kam sniew.
