New Delhi, Nailur:
Ka NASA ka la sdang ban khanglad ïa ki nong China kiba don ïa ki visa kiba biang, ba kin ym ïoh ban ïashim bynta ha ki prokram jong ka, kaba pynpaw ïa ka jingïatynjuh bor kaba jur hapdeng ki ri kiba ïaleh pyrshah.
Kane ka jingpynkylla ïa ka polisi la dep ban ïathuh nyngkong da kawei ka Rynsan Pathai khubor jong ka US bad hadien pat la pyntikna da ka tnat jong ka sorkar US hi.
“Ka NASA ka la shim ïa ki lad ki lynti hapoh jong ka, kiba ïadei bad ki nong China, kynthup ïa ka jingkhanglad ïa ka jingïoh rung ha ki jaka treikam bad ha ki prokram haw-haw, ki tiar bad ka network jong ngi, ban pynthikna ïa ka jingshngaiñ bad ka jingïaid beit- ïaid ryntih ki kam jong ngi,” ong ka nongrah ktien jong ka NASA, ka Bethany Stevens, haba ïakren bad ki nongthoh khubor ha ka Sngi Balang.
Katkum ka khubor jong ka Bloomberg, ki nong China mynshwa ki la shah ban trei kum ki kontraktor lane ki samla pule kiba noh synñiang sha ka jingwad bniah, watla kim dei kum ki nongtrei.
