Jowai, Nailur 15
Ka Lumkhangdong Kyndongtuber bad Youth Welfare Ïooksi SC ki la jam sha ka quarter final ha ka lympung ïalehkai 3rd Division Football Tournament na ka bynta ka 5th Adelbert Laloo Memorial Trophy ba la pynïaid da ka West Jaiñtia District Sports Association (WJDSA) ha ka lah sngi U Blei.
Ha ka jingïakhun pre-quarter final kaba la long ha Kiang Nangbah Stadium kaba ha Jowai, ka Lumkhangdong Kyndongtuber ka la pynjem khnap ïa ka Lumchyrmang Mihmyntdu da 7-1 kol. U Medawan Phawa u la khyrwit da ka hat-trick hadien ba u la thep san kol ha ka minit 16, 26, 28, 76 & 77, ha kaba la bynrap sa u Phorki Shyrmang (2) bad u Kyrchanlang Shylla (80+3).
Na ka liang ka Lumchyrmang Mihmyntdu ka la pynphai kylla shi kol lyngba u Embor Churmang ha ka minit kaba 44 hashwa ban kan mad ïa ka jingshah rem.
Ha ka jingïalehkai kaba bud, ka Youth Welfare Ïooksi ka la jop da 4-1 kol ïa ka Umchangiar. U Sammaïa Sumer ruh ula khyrwit da ka hat-trick hadien ba u la thep ha ka minit 8, 70 & 74 bad ïa kawei pat la pynbud da u Pyrchang Tangliang ha ka minit 41. Katba ka shi kol jong ka Umchangiar la thep da u Tremi Phawa ha ka minit kaba 38.
Ha ka jingïalehkai 2nd Division Football Tournament na ka bynta ka 8th Debo Shullai Memorial Trophy, ka Mulang Ïalong ka la jop da 3-0 kol ïa ka Lumpyrtuh Mihmyntdu. Ïa kine la thep da u Richard Mulieh ha ka minit kaba 29, kumjuh u Chalet Phawa (53) bad u Tympang Tangliang (67).
Ha ka 16 tarik ka jingïalehkai pre-quarter final jong ka 3rd Division kan long hapdeng ka Mookymphad Mihmyntdu pyrshah ïa ka Saiñdur Mihmyntdu ha ka por 10 baje mynstep, katba ka Riatsaliya Mihmyntdu ïa ka Lumshliarshliar Mupliang SC ha ka por 12 baje mynsngi.
