Jowai, Nailur 15
Ka Niriang SC ka la khur jingjop ha ka Super Division Football Tournament na ka bynta ka Kelsiroy Pala Memorial ba la pynïaid da ka Thadlaskeiñ Sports Association (TSA) ha ka lah sngi U Blei ha Wahïajer Multi Sports Complex.
Ha kane ka jingïakhun ka Niriang SC ka la pynliem noh ïa ka Nongkhroh Krem Kum da 3-2 kol. Tang mar ïasdang ka jingïalehkai ka Nongkhroh Krem Kum ka la pynkhih jar nyngkong ha ka minit kaba 2 lyngba u Aibiang Nongrum, hynrei hadien ar minit ka Niriang ka la pynphai kylla lymgba u Pyndap Kharmuti na ka bynta ban ïakhaid mar shi kol.
Hapdeng kane ka jingïakhun ka Niriang ka la thep biang ïa ka kol kaba ar lyngba u Benbarwill Dkhar ha ka minit kaba 7. Kane ka kynhun ka la pynbud biang ïa ka kol kaba lai ha ka kylla miet lyngba u Dao Muruh (71). Hashwa ban wai ka Nongkhroh Krem Kum ka la pynphai biang ïa ka kol kaba ar lyngba u Anthony Mynsong (84) hashwa ba kan mad ïa ka jingshah rem.
Kane ka lympung kan bteng biang ha ka sngi Balang hapdeng ka Mukhla Raij pyrshah ïa ka Heiboriong Iong I FC ha ka por 1 baje mynsngi, katba ka Nongkhroh Rim ïa ka Mookyndur ha ka por 3 baje nohphai sngi.
