Shillong, Nailur 15
Hadien shi sngi ka jingjah rngai jong i heprit Insaphira Lyngdoh Mawnai, ba dang 4 snem ka rta na ka shnong Nongrah Nonglum Brei, la lap noh ïa ka metïap jong i na kawei ka jaka ba lang um ha kawei ka ïing briew kaba dang shu shna thymmai.
Ïa ka metïap jong i tei i heprit la lap ba la shah ban ha u maw na ki bynta jong ka met ha katei ka jaka lang um bad i la ïap dem pyllup.
I heprit Insaphira i la jah na ïingsah ha ka step jong ka sngi u Blei ha ka por ba i dang ïalehkai marwei ha phyllaw ïing, katba ki bahaïing hasem ki dang thiah.
Katkum ka jingïathuh ki nongïalam shnong, ïa ka metïap jong i heprit Insaphira la lap nyngkong eh da ki nongtrei misteri kiba trei bylla ha katei ka ïing ha ka por mynstep jong ka lah sngi u Blei, ka 15 Tarik u Nailur 2025, ha ka por ba ki paidbah nongshong shnong ruh ki dang ïa pynlong ïa ka jingwad.
Ka jingïap jong i heprit Insaphira ba la lap ha katei ka ïing briew ba dang shu shna thymmai, la suba ba ka dei ba i la shah pynïap shwa bad ki sa wan bret dusmon pat ha katei ka jaka.
Ka jaka ba la lap ïa ka metïap jong i heprit Insaphira ruh kam da jngai na ka ïingsah, ha kaba ka don tang kumba 200 metre eiei ka jingjngai bad kadei ruh ba mar shiliang bad ka jaka ba ki sah.
Hadien ba la lap ïa ka metïap jong i heprit la wan noh na ka liang ka kynhun Forensic Crime Scene Unit ban leh ïa kaba donkam na ka bynta ban peit bniah ïa ka jinglong jingman bad hadien kata ki bor pulit ki la rah noh ïa i heprit Insaphira sha NEIGRHIMS Hospital, Shillong ban pyndep ïa ka post mortem.
Ha kane ka step la sakhi ruh ïa ka jingwan u Superintendent of Police ka EKHD, U Bah Vivek Syiem, ha kaba u la leit ban rung shapoh ka ïingsah jong i heprit bad u la leit ruh sha ki khlaw ba marjan ban pynlong ïa ka jingpeitbniah.
Lah ban kdew hangne ba naduh ka step jong ka sngi u Blei ba I heprit Insaphira I la jah na la ïing, na ka liang ki bahaïing hasem ryngkat bad ki nongshong shnong ki la ïa leit wad kylleng-kylleng ki jaka ba marjan bad kiba jngai ruh hynrei kim shym la lap satia bad dei ha ka step ka ba bud jong ka 15 tarik ba la lap pat ïa ka metïap I heprit na kawei ka ïingbriew kaba dang shna thymmai.
Ka la mih ruh ka jingkynnoh na ki bahaïing hasem, ki paidbah bad na ki nongmihkhmat ruh kumjuh, ba kane ka jingïap jong I heprit kam dei kaba i la ïap ha katei hi ka jaka hynrei kadei kaba la pynïap dusmon bad sa shu wan bret pat ha katei ka jaka.
Haba ïoh ban ïakren bad u Rangbah Shnong ka Nongrah u Bah Denis Lynrah, u la pynpaw ïa ka jingsngewsih kaba jur halor kane ka jingjia ïa I heprit.
Haba kylli u la ong “Namar ka jingjia ki kam sniew ha Nongrah ka ju jia khah-khah, kumta ka shnong nangne shakhmat kan sa pyrkhing bha ban buh da ki aiñ shnong”.
Shuh shuh u la ong ba ka komiti jong ka shnong ka dei ba dang shu bat tang shi snem mynta ïa ka kam, da kaba pynthikna ruh ba hadien nangne yn sa pyrkhing shuh-shuh bun ki aiñ shnong ban tehlakam ïa kine ki kam sniew ba ju ïai jia ha kane ka thaiñ. Haba bynrap pat na ka liang u MDC ka Nongthymmai Konstitwensi u Bah Winston Tony Lyngdoh, u la ong ba na ka liang jong u, kum u nongmihkhmat u don ka mynsiem ka jingsngewkhia namar ha ka shnong Nongrah la ju ïohi shibun ki khubor kiba sngewsih kiba ju jia na ka por sha ka por. Kumta u la ong ba u la ïakren bad u Rangbah Shnong ban shim noh ïa ki sienjam ba kham tyngeh nangne shakhmat.
“Ka aiñ ka synjor palat bad donkam ban don ki aiñ kiba kham khlaiñ nangne shakhmat namar ka jingshah thombor ïa ki heprit ka ju jia na ka por sha ka por” la bynrap u Bah Winston.
