Khliehriat, Nailur 15
Kawei ka longkmie bad ar ngut ki khun kynthei jong ka, la lap ba ki la ïap hapoh ka ïing sah jong ki ha Green Colony, Topcem Cement Limited, Thangskai, East Jaiñtia Hills ha ka 14 tarik Nailur.
Kane ka longkmie kaba la khlad la tip kyrteng kum ka Rippa Das, 24 snem ka rta, katba ki khun kynthei jong ka, ka Punchami Das kaba 8 snem ka rta bad ka Arpita Das kaba dang 3 snem shiteng.
Kane ka longïing ka dei na Baratali, kaba hap hapoh ka thanad Kalain kaba don ha Cachar District jong ka jylla Assam.
Katkum ka jingïathuh ki pulit, ha ka jingkren bad u kurim jong katei longkmie kaba la khlad, u Apon Das, 35 snem ka rta, u la ïathuh ba u la mih leit trei hadien ba u la dep bamja sngi ha ka por 2 baje nohphai sngi eiei jong ka 14 tarik u Nailur hynrei haba u la wan phai na jingtrei ha ka por kumba 5:50 janmiet, u la lap ba ka kamra ka la khang na shapoh bad da ka jingïarap jong ki para marjan, u la lah ban plie ïa ka jingkhang bad u la lah ban rung shapoh kamra bad hapoh katei ka kamra ula lap ïala ka lok jong u, kaba la sdien ha u tyllai uba la sop da ki jaiñ ha ka pakha katba ki arngut ki khun kiba thiah ha jingthiah khlem tip eiei, hynrei kine ruh ki la dep khlad. Mar kumta hi u la pyntip sha ki bor pahara.
Na ka liang jong ki pulit kila register ïa kane ka case, bad ka jingtohkit ka dang ïaid shakhmat.
