Shillong, Nailur 15
Ka Sorkar Jylla Meghalaya ka la pynlong ïa ka jingaikhublei khatduh ïa u Dr. D.D Lapang u ba la long u Myntri Rangbah barim ka Jylla, uba la bat haduh san sien ïa ka shuki kum u Myntri Rangbah ka Jylla, ïa kane ka jingïalang la pynlong ha Madan Student Jaïaw, Shillong shuwa ban leit ontep don burom ïa u ha u lum jingtep ka Balang Presbyterian Jaïaw kaba don ha Weiking, Shillong.
Ki Nongïalam saiñ pyrthei, ki seng bapher bapher ki la pyndonburom ïa une u rangbah ka saiñ hima sima ba la ai jingshakri slem duh ha ka Jylla, uba la khlad noh, myn ha ka miet 12 tarik Nailur ha ka Bethany Hospital, Shillong.
Ha Ka jingïalang ai khublei khatduh ïa u (L) Dr D D Lapang ba la pynlong da ka Sorkar, la wan ïashimbynta da u Conrad K Sangma, ki symbud Myntri rangbah, ki Myntri sorkar, ki Nongialam seng saiñ pyrthei bapher-bapher bad ki Ophisar na ka Sorkar Jylla ha ka jingïadon ryngkat ki ba ha ïing ha sem.
U Myntri Rangbah ka Jylla, ki Symbud Myntri, u Nongïalam ka Liang Pyrshah, ki MLA, MDC bad ki ophisar Sorkar ki la buh syntiew ha syndah ka synduk u (L) Dr.D.D Lapang ba la tap don burom da ka lama lai rong ka Ri India. Kum ka dak ka jingburom ïa ka mynsiem ba la leit noh jong une u Nongialam barim ka Jylla, la don ruh ka jingsiat suloi ba laisien.
Ha katei ka jingïalang, ki briew na kylleng ka ri Khasi bad Jaiñtia kynthup ki khynnah skul bad samla pule ki la wan ai khublei khatduh ïa une u Nongïalam ba pawkhmat ka Jylla.
U Myntri Rangbah u Conrad K Sangma ula pynpaw ka jingburom naduh ka dohnud ïa u Myntri Rangbah barim u (L) Dr D.D Lapang, haba ñiew ïa u kum u Nongïalam ba trei minot, uba aiti ïalade ban shakri ïa ka Meghalaya bad ki paidbah.
U Conrad ula pynkynmaw ïa ka jingsdang kaba rit jong u (L) Dr. Lapang bad ka jingkiew jong u sha ka kyrdan kaba pawnam lyngba ka jingtreishitom bad jingkut jingmut.
U la ong haba kynmaw ïa ka jinglong nongïalam ba skhem u (L) Dr. Lapang, u long kum ka sharak jingkyrmen bad uba la don bynta naduh ki sngi ba sdang ka jingïakhih Hill State.
U Conrad u la pynpaw ba ula ithuh ïa (L) Dr. Lapang naduh ba u dang khynnah bha lyngba u Kpa jong u, u Purno A Sangma. Hadien ula ïoh ïa ka burom ban ïa shakri bad u Dr. Lapang hapoh ka Ïingdorbar Thawaiñ, ha kaba ula sakhi ïa ka jingaiti lut u Dr. Lapang ban ai jingshakri ba shirthem ïa ki paidbah.
“U dei u nongkren uba don ïa ka bor bad ula shakri da ka jingshemphang kum u Myntri Khynnah, Myntri Sorkar, Myntri Rangbah bad Nongïalam ka Liang Pyrshah. Ka sur jong u ka la sawa jam ha ki kynroh ka Ïingdorbar Thawaiñ bad poi ruh sha u mawmer ba khatduh” la ong u Conrad.
U Conrad ula ban jur ruh ïa ka jingngeit jong u (L) Dr. Lapang ha ka jingïakren, ka jingsuk bad ka roi ka par kaba suh thied na ka jingithuh kyrpang jong ka Meghalaya. Ula ïoh ïa ki jinghikai u (L) Dr. Lapang halor ka kam nongïalam, kaba ban jur ïa ka jingshakri khlem da donkam ïa ka jingïathap kti, ban ïeng syndah bad u briew ba khatduh tam bad ban shakri ïa kiba rit tam.
U Conrad ula ong, u (L) Dr. Lapang u la noh synñiang kum ha ka jingpynkhlaiñ ki bor synshar khadar, ka jingkynshew ha ki samla, ka jingpynshlur ban kyntiew ïa ka jingbishar ba hok bad ba kdup lang ïa baroh bad ban plie lynti ïa ka jingsuk lyngba ka jingïateh kular sangeh ïasiat bad ki kynhun kai khlaw.
U la pynkynmaw ïa ka jingpyrshang jong u (L) Dr. Lapang ban kyntiew kyrdan ïa ka Ri-Bhoi bad ka Baghmara kum ka District, ban pynkha ïa ka Meghalaya State Women Commission bad ban kyntiew ïa ka jingshakri ha ka koit ka khiah lyngba ki prokram kum ka Cancer Detection Program bad kiwei kiwei.
U Conrad u la ong, Ki matti u (L) Dr. Lapang kin ïai ai mynsiem ïa ki pateng ban wan bad ba ka Jylla kan pynïaid shakhmat ïa ki jingïohi jngai jong u bad ban ïatylli da kajuh ka jingmut.
U Nongialam ka Liang Pyrshah, Dr Mukul Sangma haba pyndonburom khatduh ïa u Myntri Rangbah barim ka Jylla ula pynkynmaw ïa ka jingshakri ba neh slem bha jong u (L) Dr. Lapang ïa u paidbah bad ka jingïoh jong u ïa ki lad ban pynbteng ïa ka jingshakri wat hadien ba la noh ka met.
U Mukul ula pynpaw ba u peit ïa u (L) Dr. Lapang kum u nonghikai ban shim nuksa ha shuwa ba un rung sha ka jylli saiñ pyrthei. Ula pynkynmaw ïa ka jinglong nongïalam u (L) Dr. Lapang ha u snem 1988 ha ka Congress Legislature Party, ka jingkut jingmut jong u ban pynbteng ka jingshakri ïa u paidbah, wat hadien ka rta ba 69 snem.
U Mukul la ai jingïaroh ïa ka jinglah u (L) Dr. Lapang ban aiti bad ban saiñdur ïala ki paralok, wat hapdeng ki jingduna ba bun jong ki. U la ong ba ka jinglong ba ïaishah u (L) Dr. Lapang, ka jingminot bad jingtrei shitom ki dei ki jinglong ba kongsan kaba pynïoh ïa u ka jingshaniah bad ka jingsngew skhem jong ki paralok ba ïatreilang.
U Symbud Myntri Rangbah ba khmih ïa ka kam Pohïing, Bah Prestone Tynsong ula ong ka jingkhlad noh u (L) Dr. Lapang ka long ba ka Jylla ka la duh noh ïa u nongïalam ba radbah uba la noh synñiang shikatdei eh sha ka roi ka par jong ka Meghalaya.
U Bah Prestone ula ong, ban ïai kynmaw ïa u (L) Dr. Lapang kum u nongprat lynti ba hakhmat eh ha ka ban seng ïa kiba bun ki jaka pule bad ki seng trei mon sngewbha hapoh ka Jylla, kiba la ïarap ha ka jingkiew shaphrang bad ka roi ka par ka Meghalaya.
U Symbud Myntri Rangbah ula iathuh ïa ka jingshem jong u shimet ha ka ba ïatreilang bad u (L) Dr. Lapang, u la pynkynmaw ïa ki jingsyllok halor ka roi ka par ha baroh ki liang jong ka Jylla. Ula ïathuh ba u (L) Dr. Lapang ula wan ïasoh bad ka National People’s Party (NPP) hadien ba ïeh ïa ka Congress, namar ka jingïohi jngai jong u na ka bynta ka jingkiew shaphrang jong ka Jylla.
U khun jong u (L) Dr.D.D Lapang u Bah B.R Blah, haba ai jingkren ula ai ka burom ïa ka jinglong nongïalam bad ki matti u Kpa jong u, u la ban jur ba u Kpa jong u, u ngeit skhem ha ka jingshakri ïa kiwei ha ka jaka ban beh ïa ka bor. U Bah Blah ula pynkynmaw ïa ka jingsdang ka lynti ïaid kaba rit jong u Kpa kum u nonghikai bad ka jingkut jingmut jong u sha ka pule ka dangle kum ka lynti ban pynkupbor ïa kiwei.
U Bah Blah ula pynkynmaw ïa ki kyntien u Kpa jong u, “Ka jingstad ka dei ka sharak ïa ka jingdum” kaba kdew ïa ka jingkongsan ka jingnang jingstad ban ïarap ïa kiwei ba kin shem ïala ka lynti ïaid. Ula pynpaw ba u Kpa jong u, u la kit ïa ki jingkyrmen jong ka Meghalaya da ka jingaiei bad ka jingsngewrit, khlem da klet ïa la ki tynrai. Kum u nongai jingmut ba rangbah jong ka Sorkar, u (L) Dr. Lapang u la ïaibteng ban nang ïoh jinghikai bad hikai ruh ïa kiwei, haba ai mynsiem ïa ki da ka rukom long nongïalam jong u.
