Shillong, Nailur 15
U MDC ka Sohra, Bah Titos Chyne u la ong ba ka jingshah pynïap jong i heprit Insaphira Lyngdoh Mawnai ka dei ka jingleh dusmon, bad ka jingpynïap kaba la palat liam, ba kum ka jaidbynriew tipbriew tip Blei kam sngewlah ban pdiang ïa kane.
U Bah Titos u la pynpaw ïa kane ha ka por ba u leit ban sngewlem ïa ka ïing ka sem jong i heprit Insaphira Lyngdoh Mawnai ha ïingsah ha Nongrah-Nonglum.
“Nga pynrem jur ïa kane ka jingjia bad nga da kyrpad ïa ki paidbah bad kumjuh ïa ki bor jong ka aiñ ba ki dei ban trei shitom ban wad ïa kine ki briew ki ba donkti ha ka ban leh ïa kane ka kam bad dei ban pynshitom ruh ha ka rukom ka ba dei” la ong u Bah Titos.
U la ong, kum kine ki jingjia ki ba ym ju khmih kynti ba kan jia ha ka jaidbynriew ki khasi, kane ka dei ka jingjia kaba ishyrkhei, ka la dei ka por ba kum ka jaidbynriew bad ki shnong ki thaw ki seng samla ki seng longkmie ki dei ban ïa mih paidbah ban pynrem ïa kum kine ki jingjia.
U la ong, ha kum kine ki jingjia, ki bor jong ka aiñ ki don la ka jong ka bor, hynrei kum ki nongshong shnong ki hap ban peit bha ba ïoh don ki riewthrang snam ki riew sniew lane ki nongleh bymman hapoh ka shnong ka thaw bad ym dei ban ailad ba kin ïoh riehtngen hapoh ka shnong ka thaw.
U la kyntu ïa ki kmie ki kpa ba kin long kiba phikir bad ban peit bha ïala ki jong ki khun haba ki leit sha skul ne ki mih shabar bad ki dei ban buddien ïala ki jong ki khun.
