Shillong, Nailur 15
Ka Mawlai SC ka la jam sha ka kyrdan ba hakhlieh ha ka Shillong Premier League 2025, hadien ba ka la lah ban pynliem noh ïa ka Mylliem SC da 4-0 kol bad u Loving Suting u la ïoh da ka hat-trick ha ka lah sngi U Blei ha SSA Stadium kaba ha First Ground, Polo.
Ha kane ka jingïakhun u Loving u la ïoh ban khyrwit ïa kitei ki kol ha ka minit kaba 16, 40 & 49, katba ïa kawei pat la pynbud da u Fairming Suting (18).
Hadien ka wat jingïakhun kaba san (5 round), ka Mawlai ka la lah ban tam ïa ka Nangkiew Irat da 12 poiñ la 10 poiñ, katba ka Mylliem ka la ïai sah ha ka kyrdan ba hynñiew bad 5 poiñ.
Kumba ka paw kane ka jingïakhun ka la long kaba noh shilliang, hynrei dei ka Mylliem kaba la ïoh nyngkong ïa ka kabu kaba biang, hynrei u Wanshan Dkhar u la shut shabar na u diengkol.
U Loving u la lah ban pynurlong kawei na ki ar tylli ki jingpyrshang. Nyng-kong u la shah khanglad ha u rangapkol ka Mylliem u Rihoklang Khongjoh, hynrei utei u rangïalehkai ka Mawlai u la ïoh biang sa shisien pat bad u la ïoh ban pynkhih jar.
Tang hadien ar minit u Loving u la pynbud bol na ka bynta u Fairming, u bym shym pynlehnohei ïa kane ka kabu ksiar hadien ba u la ïoh ban shut na shabar ka ‘box’.
Watla ha ka sngi Ba-ar jong ka taïew ba la lah ka Mylliem bad katei la lahduh jong ka aïom ba la lah ki la ïakhaid mar 1-1 kol, hynrei ha kane ka jingïakhun ka Mylliem ka la pynlehnohei ïa ki kabu kiba biang.
Hashwa ban kut ka jingïalehkai step u Kevin Rymbai u la ïoh ban shut ïa ka bol ha kaba la leit dei na diengkol bad ka la her shaba don u Loving, uba la lah ban thep ïa ka kol kaba ar na ka bynta ban tam da 3-0 kol.
Hadien katto katne por ba la bteng ïa ka jingïakhun jong ka kylla miet, u Fairming u la pynbuh bol na ka bynta u Loving uba la ïoh biang ban thep kol na ka bynta ban khur syndon ïa ka hat-trick.
Ka Mylliem kam shym la lah ban pynphai watla ka la pynmih ïa ki ar ngut ki rangïalehkai kata u Jan-hame Marngar bad u Kolis Lyngdoh, hynrei ha kaba kut ka la mad ïa ka jingshah rem. Kumba ka paw kane ka long ka sien kaba nyngkong ba ka Mylliem kam shym la lah ban thep wat tang shi kol ruh.
Na ka liang ki bor pynïaid ki la pynbna ïa ka SPL yn pynsangeh shwa shi por na ka daw ba ka SSA Stadium kan pynlong ïa ki jingïalehai quarter final jong ka Second Division 2025 ka ban sdang naduh ka sngi Ba-ar bad ruh ka jingplie ïa ka Meghalaya State Women’s League, ka ban sdang ha ka sngi Saitjaiñ. Te kumta ka SPL kan bteng biang naduh 24 tarik mynta u bnai ha kaba ka Malki kan ïakynduh pyrshah ïa ka Nongrim Hills ha ka por 3:30 nohphai sngi.
