Shillong, Nailur 15
U Bah Ardent M Basaïawmoit u la kynnoh ba dei ka jingsynjor palat ka aiñ ba sa jia khah-khah ki kam sniew, ha kaba u la dawa ruh na ka Sorkar ban dei ban leh da kaba tyngeh ïa ki briew ki ba donkti ban shim ïa ka jingim i heprit Insaphira Lyngdoh Mawnai.
Ïa kane u Bah Ardent u la ong, haba ïoh ban ïakren ha ka por ba u leit sngewlem ha ïingsah i heprit ha Nongrah-Nonglum ha ka por janmiet jong ka sngi ba lap ïa ka met jong ine i heprit.
U Bah Ardent u la pynpaw ka jingpang mynsiem haba ïadei ka jingshah pynïap jong ine i heprit, “ka long ka jingsngewsih kthang ïa ki bahaïing hasem bad ruh kum ka imlang ka sahlang, ba kum kine ki jingjia ki nang ïai jia na ka por sha ka por hapoh ka ri Khasi”, u la ong.
U la pynpaw ka jingsngewsih kthang ïa ka jinghiar ka imlang ka sahlang bad ka jingbymlah ka Sorkar ban tehlakam ïa ka shongsuk shong shngaiñ, bad ong “kane ka la dei ka por ba kum ka jaidbynriew ka dei ban ïeng rangbah ban khanglad ïa kum kine ki jingjia, ban pyni ïa ka jingïaryntih bad ka jingïatylli ban ïeng ïaleh kum ki paidbah bad kum ka jaidbynriew ban pynpaw ka jingpyrshah ïa kum kine ki jingjia.”
U la ong, ha kane ka Dorbar Thawaiñ ba dang shu dep, u la kren halor ka jingkiew ki kam sniew ha ka Jylla, ha kine ki sngi, ym dei tang ki jingshah pynïap, hynrei ki jyllei ki kam sniew, ki kam tuh kam thiem, ki kam leh bor, bun ki longïing longsem ki mat bad ong ba kane ka jingjyllei ki kam sniew ka dei ka jingsynjor bad jingbymlah bha ka aiñ ban treikam bha, kaba dei ban peit bad ban ai ka jingshngaiñ ïa ki paidbah. U Bah Ardent la pynrem jur ïa ki briew kiba donkti ban shim ïa ka jingim i heprit Insaphira Lyngdoh Mawnai bad u la dawa na ka Sorkar ba ka dei ban shimkhia bad ban pynlong ka jingtohkit kaba bniah haduh ban da lap ïa ka tynrai bad dei ban pynshitom ïa ki briew kiba donkti bad ka jingpynsaja kam dei shuh ban sting hynrei ban ai beit da kaba tyngeh.
